Според ВМРО-ДПМНЕ, Спасовски молчел и не ѝ го одзел овластувањето на фирмата за технички преглед, овозможувал таа да заработува нелегално и со тоа, како што велат, едноставно направил злоупотреба
Владејачката ВМРО-ДПМНЕ денеска упати обвинувања кон поранешниот министер за внатрешни работи од СДСМ, Оливер Спасовски, велејќи дека е дел од групата предводена од „другарите Венко Филипче и Зоран Заев на која основна дејност им се криминални активности“.
Од партијата во соопштението испратено денеска велат дека за Спасовски е поднесена кривична пријава за злоупотреба на службена положба и овластување, бидејќи во 2021 година како министер, и овозможил на станица за технички преглед во Општина Сарај да се стекне со противправна имотна корист од над 90 000 евра или околу пет и пол милиони денари.
„Спасовски и по предлог на надлежните не донел решение за одземање на овластување за технички преглед во законски предвидениот рок“, се вели во соопштението од ВМРО-ДПМНЕ.
Според ВМРО-ДПМНЕ, Спасовски молчел и не го одземал овластувањето на фирмата за технички преглед, овозможувал таа да заработува нелегално и со тоа, како што велат, едноставно направил злоупотреба.
„Но, трагедијата не завршува тука. Истиот технички центар дал зелено светло за технички преглед на автобусот на ‘Беса Транс’ кој се запали во Бугарија, настан во кој загинаа 45 македонски граѓани“, додаваат од партијата.
Оттаму велат дека ексминистерот Спасовски е должен да одговори како и дали земал пари за неодземање на овластувањето на фирмата, колку пари и дали можеби трагедијата со автобусот на Беса Транс му ја проработила свеста.
Од ВМРО-ДПМНЕ велат дека СДСМ може да функционира како сериозна политичка партија, но за тоа, се додава во соопштението, треба да се ослободи од лицата во истата кои се олицетворение на криминалот.
Министерството за внатрешни работи пред четири дена поднесе кривична пријава против против ексминистерот за внатрешни работи Оливер Спасовски поради сомнение за злоупотреба на службената положба и овластување.
Според кривичната пријава поднесена до ОЈО Скопје, додека ја вршел министерската функција, во текот на 2021 година, Спасовски ја искористил својата службена положба и овластување и на фирма за технички преглед во скопски Сарај ѝ овозможил да се стекне со противправна имотна корист во износ од 5,5 милиони денари.
Делото за кое е осомничен, како што се додава во пријавата, Спасовски го сторил на начин што во законски предвидениот рок не донел решение за одземање на овластувањето за вршење технички преглед врз основа на предлогот кој бил доставен од надлежна организациска единица за граѓански работи.
Иако во пријавата изречно не е наведено, извесно е дека станува збор за фирмата „Виа комерц“ од скопски Сарај, односно за постапката за одземање на дозволата за работа поради претходно утврдени неправилности.