Потпретседателот Александар Николоски и секретарот за меѓународна политика на ВМРО-ДПМНЕ, Тимчо Муцунски, оствариле средба со шефот на Делегацијата на Европската Унија во Скопје, Самуел Жбогар.
На средбата, како што информира партијата, Жбогар бил известен за напорите кои го прави ВМРО-ДПМНЕ за составување ново парламентарно мнозинство.
„За ВМРО-ДПМНЕ е важно да се почитуваат правото и правната држава и да се направи коалиција која ќе се темели на определбите за интеграција на државата во Унијата, но и коалиција која ќе ги почитува законите и владеењето на правото. Државата мора да напредува на патот кон Европската Унија, а за да се постигне тоа потребна е нова влада со легитимитет од граѓаните со агенда за суштински реформи кои ќе го подобрат живеењето на граѓаните и санкционирање на криминалот и корупцијата“,
се наведува во соопштението.
Исто така, од ВМРО-ДПМНЕ му посочиле на евроамбасадорот дека според нив, изборите поминале во недемократска атмосфера, со сериозни прекршувања, организиран поткуп и прекршувања на изборните правила.