Опозициската ВМРО-ДПМНЕ реагираше на прес-конференцијата на министерката за финансии Нина Ангеловска, на која таа ги објаснуваше мерките за помош од Владата за стопанството.
Од партијата посочуваат дека интересот на фирмите за искористување на владините мерки е мал, бидејќи како што велат, тие се несериозни и задоцнети.
„Нина Ангеловска, изгубена во времето и просторот, се однесува како Алиса во земјата на чудата и не знае дека нема бизнисмен и гранка која ги поддржува мерките. Додека владата и Ангеловска тврдат дека ќе бидат поддржани дури 250 000 вработени или повеќе од 35 000 компании, во реалноста граѓаните се сведоци дека многу мал број на фирми аплицираат за мерките и веќе се започнати масовни отпуштања од страна на компаниите кои се соочуваат со проблеми на неликвидност. Неделувањето на власта веќе остави над 20% од вработените во државата без работа“,
пишува во соопштението.
Од ВМРО-ДПМНЕ упатија критики и за најавите за зголемување на акцизата на горивата.
„Намерата на Нина Ангеловска и Зоран Заев да ја разгледуваат можноста за покачување на акцизата на горивата е доказ дека тие ја разбираат кризата како можност да се удри по граѓаните и да им се одземат пари за да се покрива расипништвото на СДСМ. Срамно е во кризни моменти да се ставаат раце во плитките џебови на осиромашените граѓани“,
порачаа од ВМРО-ДПМНЕ.
Поврзани вести:
Ангеловска со објаснување: Кој и како може да ги користи мерките за поддршка од Владата (ВИДЕО)