За реакцијата на стопанските комори, министерката посочи дека буџетот сега се соочува со значаен пад на приходите по основ на акцизи, но и со значаен пад на цените на горивата, што, сепак, не влијаело на пад на цените на транспортот
Приходот од акцизата на горивата е значајна ставка во буџетот на државата и кое било решение да го донесеме по ова прашање, тоа нема да биде на штета на граѓаните, рече, на денешната прес конференција, министерката за финансии Нина Ангеловска. Таа посочи дека можното зголемување на акцизите е антикризна мерка што треба добро да се анализира.
Одговарајќи на новинарско прашање во врска со реакциите на стопанските комори на најавите за можно зголемување на акцизата, по падот на цените на горивата, Ангеловска рече дека Владата подготвува анализи за тоа, како можност да се зголемат приходите во буџетот, поради дефицитот кој се појави како резултат на намалената потрошувачка.
„Во подготовка сме на анализи во врска со акцизата на нафтените деривати. Дополнително ќе излеземе со информација дали решението ќе биде изедначувење или покачување на цената на нафтата. Треба да бидеме внимателни, да базираме одлуки на анализи. Во овој момент разгледуваме колкаво е користењето на екстра лесната нафта. Во оваа несреќна околност со кризата со која се справуваме, среќна околност е драстичниот пад на цената на нафтата. Зборуваме за пад на малопродажните цени од 20 денари. Зборуваме за важноста на акцизните цени по однос на приходите во буџетот кои се намалени поради намалената потрошувачка. Кое било решение што ќе го донесеме нема да удри по џебот на граѓаните“,
рече Ангеловска.
Таа посочи дека буџетот сега се соочува со значаен пад на приходите по основ на акцизите, но и со значаен пад на цените на горивата, што, сепак, не влијаело на пад на цените во транспортниот сектор.
„Треба да погледнеме и на краток и на долг рок што значи овој дефицит, бидејќи приходот од акцизата на горивата е значајна стапка во буџетот. Сега се соочуваме со значаен пад по тој основ, но и со значаен пад на цената на нафтата. Од друга страна, ако ја погледнеме транспортната дејност, овој пад не влијаеше на намалување на цените. Напротив, цените се исти, некаде можеби и зголемени поради други фактори. Треба да бидеме реални и да ги согледаме сите аспекти. Компаниите на почетокот на годината, кога ги правеле финансиските планови, не предвиделе таков пад на цената на нафтата. Се работи за антикризна мерка на која работиме заедно со Царинската управа и што добро ќе ја осмислиме“ ,
рече Ангеловска.