Потпретседателот на ВМРО-ДПМНЕ вели дека идниот мандатар Христијан Мицкоски ќе се обиде да обезбеди двотретинска поддршка во Собранието за измени на законот со кои уште од почеток новата влада би ги имала новите ресори за кои партијата се залагаше во кампањата
ВМРО-ДПМНЕ ќе се обиде да состави влада која уште на почетокот ќе биде со реорганизирани министерства како што оваа партија најавуваше во изборната кампања. Ова во емисијата „360 степени“ на МРТ 1 го кажа потпретседателот на ВМРО-ДПМНЕ, Владо Мисајловски. За да го реализира ова, на идниот мандатар ќе му биде потребна двотретинска поддршка во Собранието за промена на Законот за организација и работа на органите на државната управа.
„Ќе се потрудиме тоа да го направиме. Се разбира, мандатарот, односно претседателот Христијан Мицкоски, ќе се потруди да го направи во законскиот рок што ќе следува и мислам дека ќе успее како мандатар да направи една од подобрите влади“,
рече Мисајловски.
Прашан дали има политички договор меѓу ВМРО-ДПМНЕ и СДСМ за по евентуално прегласување на неколку избирачки места во петтата изборна единица за кои има приговори во Државната изборна комисија, СДСМ да добие уште еден манадат за сметка на ДУИ, а за возврат СДСМ да даде поддршка за законски измени за реорганизација на министерствата, Мисајловски одговори:
„Нема политички договор. Но, она што можевме да го слушнеме е дека има повеќе приговори за повеќе избирачки места… ДУИ не може да обвинува за изборен инженеринг, видовме што сè правеа на терен. Впрочем, јас бев носител во изборната единица два – што се правеше во Липково, што се правеше во Арачиново, што се правеше во Шуто Оризари и тие многу повеќе знаат, со целиот процес на поткуп, со притисоци и закани. Но, она што е реално е дека ако Управниот суд ги уважи тужбите дека може да има прегласување на неколку места, може СДСМ да земе пратеник, но може и ВМРО-ДПМНЕ да земе плус пратеник, но не можам отсега да зборувам, да видиме за кои избирачки места се работи“,
вели тој.
Во изборната програма на ВМРО-ДПМНЕ предвидени се министерство за економија и труд, министерство за енергетика, рударство и минерални суровини, министерство за социјална политика, демографија и млади, министерство за спорт, министерство за култура и туризам, како и министерство за дигитална трансформација.