Скопскиот градоначалник и кандидат за нов мандат не се огласи досега за прес-конференцијата на опозицискиот портпарол пред неговиот дом во Тафталиџе
Актуелниот градоначалник на Скопје, кој е кандидат на СДСМ за нов мандат, си ја реновира и доградува куќата од над 300 квадрати, додека во главниот град ништо не се гради, обвини денеска ВМРО-ДПМНЕ, на прес-конференција пред објект за кој тврди дека е сопственост на Петре Шилегов.
„Тука сум да му честитам на градоначалникот во заминување, Петре Шилегов, за реновирањето и подновувањето на неговата 306 – квадратни метри луксузна куќа во Скопје. Тоа што во Скопје ништо не изгради, не значи дека Шилегов не знае да гради. Затоа куќата на Шилегов се доградува, оние 306 квадрати, добиваат дополнителен луксуз. Да потсетам, среде мандатот, Шилегов се поднови и со луксузна огромна викендичка во Маврово, што, како што навел, ја платил 55 000 евра. Тоа е онаа луксузна викендичка на Маврово каде што бегаше за време на короната, додека цело Скопје беше во карантин. И се тоа со чиновничката градоначалничка плата“,
изјави Наум Стоилковски, портпарол на ВМРО-ДПМНЕ.
Стоилковски тврди и дека Шилегов мандатот го завршува со имот од четири стана, со вкупно речиси 300 квадрати, со, како што рече, луксузна куќа во Скопје и луксузна викендичка на Маврово со која што Шилегов се поднови среде мандатот!
„Тоа што економијата во Македонија тоне, Скопје изгледа на буниште, тоа што ништо што вети не изгради, не значи дека Шилегов не знае што е градба и што е луксуз. Не ја изгради Треска, ниту ја изгради Универзална, Скопје не доби тунел под Кале, ниту нов Драмски театар. Ама затоа Шилегов доби луксузна викендица, уште еден луксуз од куќа, и прашање е дали е тоа се“,
рече Стоилковски.
Шилегов не се огласи досега за прес-конференцијата на ВМРО-ДПМНЕ пред неговиот дом. Тој денеска, по повод празникот Голема Богородица беше во обиколка на манастирот „Успение на Пресвета Богородица“ на Матка., каде што беше придружуван од новите кандидати на СДСМ за градоначалници на општините Аеродром и Карпош, Александар Филиповски и Душко Весковски.
Во анкетниот лист за имотната состојба на Шилегов, што тој го подндел во Антикорупциската комисија се запишани како негов личен имот куќа од 306 квадрати во Скопје, во вредност од, како што е наведено, 24 милиони денари и викендичка со земјиште во Маврово, во вредност од 55 илјади евра, како и стан во Скопје од 87 квадратни метри.