Откако Мицкоски, Села и Гаши во петокот соопштија дека постигнале договор за предизборна соработка на ВМРО-ДПМНЕ, Алијанса за Албанците и Алтернатива за локалните избори, денеска Арсовска објави дека остварила средба со претставници на токму овие две партии
Денеска Извршниот и Централниот комитет на најголемата опозициска партија ВМРО-ДПМНЕ одлучуваат дали партијата ќе ја поддржи кандидатката за градоначалник на Скопје, Данела Арсовска, која во петокот објави дека ги собрала потребните потписи, на овие избори да биде независен кандидат, јавуваат повеќе медиуми.
Исто така, во петокот, претседателот на ВМРО-ДПМНЕ, Христијан Мицкоски и лидерите албанските опозициски партии Алијанса за Албанците и Алтернатива, Зијадин Села и Африм Гаши објавија дека договориле предизборна соработка, која Мицкоски вчера ја нарече „историска“ соработка за локалните избори за ВМРО-ДПМНЕ и за Македонија.
Арсовска, пак, денеска, на Фејсбук објави дека се сретнала со претставници на токму овие две партии, Арбен Таравари од Алијанса за Албанците и со Беким Сали од Алтернатива.
„Конструктивна средба со Арбен Таравари генералниот секретар на Алијанса за Албанците, доктор и актуелен градоначалник на Гостивар и Беким Сали, кандидат за градоначалник на општина Чаир од Алтернатива. Разговараме за идеите и решенијата за Скопје за новата програма за градот. Заедно заклучивме дека се неопходни квалитетни и ефикасни решенија за Скопје и скопјани“,
напиша таа на својот фејсбук-профил.
ВМРО-ДПМНЕ пред десетина дена утврди неколку десетици кандидати за градоначалник, но не и за градот Скопје. На тогашната прес-конференција не беше потврдено дека Арсовска е фаворит на опозицијата за кандидатурата за главниот град.