ВМРО-ДПМНЕ на прес-конференција побара да се истражи како скопско фризерско студио добило грантови од над 270 000 евра преку програмата „Еразмус+“, која ја спроведува Националната агенција за образовни програми и мобилност.
Од партијата се повикаа на истражување на „А1он“ во кое порталот пишува како на фирмата „В.Е.З Трејд“ со основна дејност „фризерски салони и салони за разубавување“ и биле делени грантови за проекти за едукации од областа на медиумската писменост, претприемништвото и сл.
ВМРО-ДПМНЕ случајот го оцени за „класична злоупотреба на парите во институцијата“ и побара да се отвори постапка.
„Јавното обвинителство за организиран криминал до сега требаше да биде влезено во агенцијата со која раководи Лидија Димова и да има отворено истрага. Но, тоа нема да се случи доколку не се изврши јавен притисок, бидејќи со тоа Јавно обвинителство командуваат Русковска и Зоран Заев“,
се вели во партиското соопштение.
Од партијата посочија дека додека во светот за вакви проекти пари добиваат угледни образовни институции, во Македонија грантови добиваат фирми што немаат врска со темата на проектот со кој што аплицирале.
„Лидија Димова, директорката од СДСМ, исплатила европски пари 270.000 евра во рок од 3 години преку неколку грантови на фризерски салон или берберница со две столчиња, сеедно, каде што една од темите на грантот за оваа година била фризерницата да едуцира за медиумска писменост во дигиталното опкружување. Неверојатно. Епа народе, на здравје бричење од страна на СДСМ. Граѓаните восиромаштија, функционерите на СДСМ во луксуз. Имено за лицето Зоран Златковски кој е сопственик на фризерницата се знае дека бил обучувач на наставници во агенцијата со која раководи Лидија Димова и познато е дека близок нејзин пријател од порано од граѓанскиот и партискиот активизам на СДСМ“,
се вели во соопштението на ВМРО-ДПМНЕ.
Димова за „А1он“ вели дека во случајот нема ништо спорно и дека грантовите се делат според содржината на проектот, а не според фирмата-носител на проектот. Таа потврдува дека сопственикот на фризерницата бил ангажиран од Националната агенција за образовни програми и мобилност за да држи обуки организирани од истата институција, но вели со тоа тој не можел да има влијание во доделувањето на грантовите.
Сопственикот на фризерницата за порталот изјави дека имал право да аплицира на конкурсот, а за реализација на проектите вели дека склучувал договори за соработка со експерти од областите.