Со измените се предвидува на судиите и јавните обвинители да им се овозможи работниот однос, односно мандатот да може да се продолжи од страна на Судскиот совет и Советот на јавни обвинители и по 64 години за мажи и 62 години за жени, до наполнување на 67 години возраст на судијата или јавниот обвинител, велат од пратеничката група на опозициската партија
Ако се тргнат овие предлози, најавуваат дека ќе гласаат за измените во однос на недела да биде неработен ден
Пратеничката група на ВМРО-ДПМНЕ бара да се повлечат измените и дополнувањата на Законот за работни односи поднесени од група пратеници од мнозинството, а кои се однесуваат на продолжување на работниот однос на судиите и јавните обвинители по возрасната граница за пензионирање.
Пратеникот Дајанчо Ефтимов на денешната прес-конференција рече дека овие измени, кои денеска се пред Комисијата за труд и социјална политика, за пратеничката група на ВМРО-ДПМНЕ се крајно проблематични и дискриминаторски.
„Со измените се предвидува на судиите и јавните обвинители да им се овозможи работниот однос, односно мандатот да може да се продолжи од страна на Судскиот совети и Советот на јавни обвинители и по 64 години за мажи и 62 години за жени, до наполнување на 67 години возраст на судијата или јавниот обвинител. Со овие измени се отвора можност за класификација на судиите и јавните обвинители на подобни и неподобни, послушни и непослушни како и можност за уште поголема и подлабока партизација на судството“,
рече тој.
Од ВМРО-ДПМНЕ сметаат дека сите овие измени за судиите и јавните обвинители во овој закон, СДСМ се обидува да ги протне во сенка на измените кои се однесуваат на недела како неработен ден кои се дел од истиов предлог-закон и каде се направени измени на кои како што велат како пратеници од ВМРО-ДПМНЕ посочувале уште кога се носеше законот.
„Овие заднински игри на СДСМ и ДУИ не се првпат и во овој случај кога функционира активната блокада од ВМРО-ДПМНЕ, измените кои се однесуваат за судиите и јавните обвинители се обидуваат да ги протнат преку измените за недела како неработен ден. Ние најавивме дека сите законски решенија кои што се штетни за граѓаните и државата ќе бидат блокирани од наша страна. Таков е случајот и со овој закон. Бараме, измените кои се однесуваат за судиите и јавните обвинители да бидат тргнати од овој предлог-закон, со што ние како пратеничка група ќе дадеме придонес за измените кои се однесуваат за недела како неработен ден“,
рече Ефтимов.