Тврдењата дека градоначалникот на Радовиш, Ацо Ристов, на кој било начин влијаел врз институција како што е Судскиот совет, од ВМРО-ДПМНЕ ги оценија за доказ на очајот на СДСМ и нивната потреба да фабрикуваат скандали, но и да го покријат, како што велат, катастрофалното наследство на нивната партија во судството
Обвинувањата дека градоначалник на мала општина како Радовиш има каква било моќ или влијание врз процеси од национален карактер, како што е изборот на членови на Судскиот совет, се апсурдни и далеку од реалноста.
Вака реагираат од ВМРО-ДПМНЕ откако опозицискиот СДСМ обвини за скандалозен избор на судијката Данка Ристова од Апелацискиот суд Штип за нов член на Судскиот совет од редот на судиите, која, како што велат, е сопруга на актуелниот градоначалник на Радовиш од редовите на ВМРО-ДПМНЕ, Ацо Ристов.
Тврдењата дека Ристов на кој било начин влијаел врз институција како што е Судскиот совет, од ВМРО-ДПМНЕ ги оценија за доказ на очајот на СДСМ и нивната потреба да фабрикуваат скандали, но и да го покријат, како што велат, катастрофалното наследство на нивната партија во судството.
„Изборот на Данка Ристова за член на Судскиот совет е направен согласно законските процедури, а нејзините професионални квалификации се клучни за оваа функција. Данка Ристова е докажан професионалец, кој повеќе од 30 години е во правосудството, и таа е избрана со мнозинство гласови на непосредни избори, каде гласале судиите од штипското апелационо подрачје, вклучително и Струмица и околината. Граѓаните знаат како се бирани судиите во Струмица и кој ги бирал, но и во цела Македонија. Оттука небулозно е да се тврди дека ВМРО-ДПМНЕ може да влијае на нејзиниот избор. Очигледно е дека кај судиите при гласањето, на крај, сепак, преовладеала мислата да изберат врвен професионалец, наместо послушник на СДС и ДУИ, како до сега“,
велат од ВМРО-ДПМНЕ во партиската реакција.
Од партијата оценија дека СДСМ продолжил да застанува во одбрана на криминалот на своите сегашни и поранешни челници, на криминалот на ДУИ и сите оние што се огрешиле пред законот.
„Стравот нема да им помогне, само може да ги доведе во заблуда дека со вакви прес-конференции може да ја запрат борбата против корупцијата и да ги задржат корумпираните судско-обвинителски и бизнис-политички спреги во моќ во правосудството. Правда доаѓа, сакале тие или не. И тоа доаѓа за сите, без разлика на партиска, етничка или верска припадност“,
додаваат од владејачката партија.
Судиите Аритон Ала од Апелацискиот суд Скопје и Данка Ристова од Апелацискиот суд Штип беа избрани за нови членови на Судскиот совет по изборите кои вчера се одвиваа во изборните места во сите судови ширум земјава.