Милошоски апелираше на разум до пратениците од СДСМ и ДУИ, за овој проблем за кој, како што рече, го креираа и секој ден станува сè поголем, да бидат човечни, да се надмине со една мала, но многу битна измена на Законот за пасоши, исто како што тоа беше направено со возачките дозволи
Пратеничката група на ВМРО-ДПМНЕ апелира предлогот на законот за измена на важењето на патните исправи со старото име, а кои се валидни, што побрзо да се најде на собраниска седница.
Пратеникот од ВМРО-ДПМНЕ, Антонијо Милошоски, вели дека во законот, чија измена и дополнување го поднеле на 12 февруари, се бара измена само на еден датум.
„Денес сакам да ја искористам оваа можност за апел до парламентарното мнозинство да не ја одолговлекува темата за измена и дополнување на пасошите. На 12 февруари поднесовме предлог на Закон за измена на важењето на патните исправи со Република Македонија кои што се валидни и се бара смена само на еден датум. Датумот 12.02.2024 година да се замени со датумот 31.12.2024 година. Овој хаос што е создаден со пасошите намерно или случајно од претходниот министер Оливер Спасовски станува преголем товар за граѓаните, чии слободи и права за движење се драстично повредени, но исто така се повредени и нивните потреби за посета во странство, лекување, образование, семејни обврски и слично“,
рече Милошоски на денешната прес-конференција.
Тој обвини дека 650 илјади граѓани се без право да излезат од државата со што, како што рече, се прекршува членот 27 од Уставот на Република Македонија кој гарантира слободно излегување од Република Македонија и се прекршува Европската конвенција за човекови права и слободи.
Овие правни акти, рече Милошоски, се со повисока правна важност од Законот кој бараме да се смени.
Милошоски апелираше на разум до пратениците од СДСМ и ДУИ, за овој проблем за кој како што рече го креираа и секој ден станува се поголем, да бидат човечни, да се надмине со една мала, но многу битна измена на Законот за пасоши исто како што тоа беше направено со возачките дозволи и со тоа, рече Милошоски, им го олеснивме животот на граѓаните кој што претходно беше загрозен со некои несовесни законски решенија.
Милошоски рече дека од Собранието им е кажано дека овој предлог закон, поднесен од ВМРО-ДПМНЕ, се уште е на превод и додаде дека е зачуден што има толку да се преведува во датумите.
„Ние бараме датумот 12.02.2024 година да биде заменет со датумот 31.12.2024 година. Се гледа дека и сегашниот претседател на Собранието не одлучува сам, веројатно во негово име одлучуваат Талат Џафери и Бујар Османи кои што се против решавање на овој проблем кој што го имаат граѓаните. Затоа, апелирам и преку вас медиумите, ова законско решение што побрзо да се најде на собраниска седница. Имаме барање за итна седница, има закажано седница на 28-ми февруари, кога и да сметаат дека е згодно, но што е можно побрзо, да го решиме овој секојдневно растечки проблем“,
додаде Милошоски.
Денеска и техничкиот министер за внатрешни работи Панче Тошковски ги повика пратениците од СДСМ и ДУИ да гласаат за овие измени на законот со кој се продолжува важноста на пасошите до крајот на годината.
Тошковски рече дека денеска добил допис од Брисел дека Европската Унија нема да прави проблем доколку граѓани на Република Северна Македонија треба да патуваат со пасоши со старото уставно име.
Тој рече дека граѓаните кои се надвор од Македонија без проблем ќе може да отидат во Унгарија, Чешка, Бугарија, но нема да можат да излезат од Македонија ако се вратат дома. Европскиот комитет, како што рече Тошковски, дава мислење до земјите да имаат разбирање, а ние што правиме – само Македонија, освен Грција, ќе крши основно човеково право на слобода и движење поради тоа што пратениците од владејачката структура – од СДСМ и ДУИ – не сакаат да стиснат едно копче.