„Само владата предводена од новиот Ванчо Михајлов во ВМРО, Христијан Мицкоски, сè уште нема поднесено барање за екстрадиција на Никола Груевски. Ова значи дека му се купува време на Груевски и намерно се одолговлекува. Груевски нема да добие азил во Турција, но веќе преговара за други опции, како Русија и Белорусија“, се вели во партиското соопштение
Опозицискиот Социјалдемократски сојуз (СДСМ) денеска постави прашања до институциите за тоа до каде е постапката за можна екстрадиција на поранешниот премиер Никола Груевски, повикувајќи се на претходно соопштение на Министерство за правда, од каде што најавија дека ќе ги побараат сите списи од надлежните судови и обвинителства за предметите поврзани со бегалецот во Унгарија и дека ќе постапат согласно законските прописи.
Во соопштението, СДСМ прашува дали Владата веќе ги подготвила документите и дали е поднесено официјално барање за екстрадиција.
„До каде е постапката? Ги спреми ли владата на Мицкоски документите? Дали е поднесено барање за екстрадиција на Груевски?“,
прашуваат од СДСМ.
Од партијата посочуваат дека додека институциите во земјава сè уште прибираат документација, други држави веќе преземаат конкретни чекори. Како пример ги наведуваат политичките случувања во Унгарија и реакциите на Полска во однос на екстрадициски постапки.
„Додека институциите во Македонија прибираат документи, други држави веќе дејствуваат по најавите на Петер Маѓар дека нема повеќе заштита за криминалци во Унгарија. Полска не чекаше туку веднаш реагираше и веќе испрати официјално барање за екстрадиција на своите политичари“,
велат од опозицијата.
СДСМ изразува загриженост дека евентуалното одолговлекување може да влијае врз исходот на процесот и повикува институциите да постапуваат поефикасно.
„Само владата предводена од новиот Ванчо Михајлов во ВМРО, Христијан Мицкоски, сè уште нема поднесено барање за екстрадиција на Никола Груевски. Ова значи дека му се купува време на Груевски и намерно се одолговлекува. Груевски нема да добие азил во Турција, но веќе преговара за други опции, како Русија и Белорусија. Во исто време Сиљановска е во Турција за спас на Мицкоски и Груевски. Овие информации отвораат сериозен ризик, Груевски повторно да избега од дофатот на правдата. Наместо итна реакција, сведоци сме на опасно одолговлекување“,
пишува во партиското соопштение.
Според опозицијата, очигледно е дека Мицкоски свесно ја кочи постапката, со цел да избегне политичка одговорност и непријатност оставајќи простор за ново бегство.
„Министерството за правда, Владата, институции да престанат да калкулираат и да постапат веднаш, да побараат екстрадиција на Никола Груевски за да се соочи со правдата. Време е за вистината, време е за правда и одговорност“,
велат од опозицијата.
Во интервју за „360 степени“, адвокатот од Хелсиншкиот комитет на Унгарија, Жолт Секереш, вели дека бегалскиот статус на едно лице подлежи на ревизија секои три години. Преиспитување може да се иницира и вонредно, но во тој случај се потребни неколку месеци за да се донесе правосилна одлука, независно од политиката и најавите на човекот кој се очекува да стане нов премиер на Унгарија, Петер Маѓар.
Не ја исклучува хипотезата дека, во теорија, Никола Груевски би можел веќе да има унгарско државјанство. Имал право да побара такво нешто три години откако првпат добил бегалски статус.
Одлуката по таквите барања, како што вели, е дискрециска, на унгарскиот претседател.