ВМРО – ДПМНЕ ги прекршува роковите за избор на нови членови на Програмскиот совет на МРТ и Советот на Агенцијата за аудио и аудиовизуелни медиумски услуги. Со вакви обвинувања излезе портпаролот на владејачката СДСМ, Костадин Костанинов, кој како одговорен го посочи претседателот на собраниската Комисија за избори и именувања, Илија Димовски.
„Веројатно, Димовски и ВМРО-ДПМНЕ се надеваат на партиски пазарења, кои се спротивни на целите на законот и кои со сигурност нема да се случат. Очигледно единствена причина е зачувувањето на нивните партиски кадри во МРТ и АВМУ, кои доведоа до катастрофалната состојба со медиумите во која беше нашата држава. За потсетување, членот на програмскиот совет на МРТ, Косана Мазнева, токму од страна на Христијан Мицкоски беше назначена за негова советничка во неговиот кабинет во ВМРО-ДПМНЕ.
– изјави Костадинов.
Димовски ги отфрли обвинувањата дека тој е кочничар на процесот. Посочува дека во последните 2 месеца контактирал со повеќе пратеници од пратеничките групи, за што поскоро започнување на процедурата за избор на членовите во двете институции. Тврди дека кај владејачкото мнозинство не постои никаква желба за дијалог.
„Оваа постапка за избор на членови на ААВМУ и МРТВ е во согласност со измените на Законот кои беа гласани едногласно во Собранието, со поддршка на опозцијата. Опозицијата да имала намера да кочи, ќе кочела уште во таа фаза. Но, новата постапка во законот за овие две тела предвидува двотретинско мнозинство во Комисијата, значи, од 13 членови со право на глас, девет треба да гласаат „за“ за сите поединечни предлози, а кога ќе дојде на пленарна седница треба двотретинско мнозинство и бадентерово мнозинство. Значи, постапката е исклучително комплицирана.“
– кажа во своја одбрана Димовски.
Илија Димовски – претседател на Комисија за прашања на изборите и именувањата
Ставот на Димовски е дека ако досега била отпочната процедурата, ќе завршела неуспешно. Тоа ќе придонесло за развлекување на процесот, бидејќи ќе морале да се објавуваат нови конкурси.
Медиумските реформи се заглавени во Собранието уште од почетокот на годината, кога и се распишаа конкурсите. Минатата недела, „360 степени“ контактираше дел од пријавените кандидати кои аплицираа на конкурсот. Покрај тоа што се уште немаат никакво формално известување до каде е процедурата, се сомневаат и на заткулисни партиски игри при процесот на изборот.