Клучната цел на предложените измени на Законот за медиуми е поддршка на националните весници кои, како што соопштија од Владата, се соочуваат со сериозни проблеми со големите трошоци за печатење и дистрибуција, како последица на високата цена на хартијата и на растот на цените на горивата
На предлог на Министерството за информатичко општество и администрација, на вчерашната владина седница беа усвоени предлог-измените на Законот за медиуми, според кои, националните весници би добивале еднократна финансиска помош од Владата. Предложените законски измени сега одат на натамошно усвојување во Собранието.
Клучната цел на предложените измени на Законот за медиуми е поддршка на националните весници кои, како што соопштија од Владата, се соочуваат со сериозни проблеми со големите трошоци за печатење и дистрибуција, како последица на високата цена на хартијата и на растот на цените на горивата.
„Со измените и дополнувањата на Законот се уредуваат: еднократна финансиска помош што печатените медиуми би ја добивале од страна на Владата; начинот на објавување на јавниот повик до печатените медиуми, како и процентуалниот износ којшто Владата ќе го покрие во делот на трошоците за печатење и дистрибуција на весниците; правото на учество и условите коишто треба печатениот медиум да ги исполнува; а се предвидува и основање Комисија којашто е надлежна да одлучува по однос на поднесените барања“,
соопштија од Владата.
Се додава дека вака утврдениот текст на предлог-измените се предлага прашањето за субвенционирањето на националните весници да се уреди системски како дел од Законот за медиуми.