Согласно документацијата на Министерството за образование и наука, тие редовно ги сервисираат своите обврски кон сите субјекти со кои има регулирани законски надлежности или, пак, со кои има склучени договори по разни основи кои иницираат финансиски обврски, што не е случај и со ЈСП „Скопје“, се вели во соопштението од Владата
Владата на Република Северна Македонија најостро ги отфрлува обвинувањата за каков било долг кон ЈСП „Скопје“, како што обвинува раководството на ова јавно претпријатие и најавува дека ќе протестира.
Од Владата, преку соопштение, информираат дека ваквата состојба во којашто се наоѓа ЈСП е показател дека општините неодговорно менаџираат со средствата наменети за превоз на учениците и навремено не ги подмируваат обврските.
„Ги повикуваме локалните самоуправи кои ги користат услугите на ЈСП ‘Скопје’ подобро да ги менаџираат своите буџети и редовно да ги подмируваат долговите кон јавното претпријатие, за да не се доведе во прашање неговото нормално функционирање во услови на економска и енергетска криза“,
се вели во владиното соопштение.
Од таму информираат дека согласно документацијата на Министерството за образование и наука, тие редовно ги сервисира своите обврски кон сите субјекти со кои има регулирани законски надлежности, или пак со кои има склучени договори по разни основи кои иницираат финансиски обврски, што не е случај и со ЈСП ‘Скопје’.
„Што се однесува на студентските картички за попусти, Законот за високото образование (член 27 став 6) уредува дека Владата на Република Северна Македонија може да донесе одлука за посебни погодности за студентите, како што се студентска картичка за попусти, бесплатен градски превоз и друго, кога средствата се обезбедуваат од државниот буџет. Но, во календарската година, не е донесена ваква одлука, од причина што во зимскиот семестар од студиската 2021-2022 година, студентите не посетуваа настава со физичко присуство на единиците во состав на Универзитетот Св. ‘Кирил и Методиј’ во Скопје“,
се додава во соопштението од Влада.
Нашата интенција како Влада, додаваат од таму, е постојано унапредување и проширување на можностите за поддршка на студентите. Ова, како што се нагласува, многупати досега е потврдено преку воведување на нови категории на стипендии, преку зголемување на износите на стипендиите, преку воведување на субвенциониран студентски оброк, доделување на ваучери за поддршка при студирањето.
„Со нормализирањето на наставата со физичко присуство секако дека во Буџетот на државата за 2023 година ќе се обезбедат и средства за превоз на студенти и доколку наставата продолжи со физичко присуство, по усвојување на владина одлука, истите би биле префрлени на ЈСП. Во меѓувреме, заедно со ЈСП ќе ги разгледаме можностите за поддршка во делот на превозот на студентите за тековниот и преостанатите два месеци од годинава доколку наставата во истите продолжи со физичко присуство“,
се нагласува во соопштението.
Денеска градоначалничката на Град Скопје, Данела Арсовска, за недостигот на пари за нормално функционирање на Јавното сообраќајно претпријатие, кое се закани дека ќе стапи во штрајк поради доцнење на септемвриската плата, како и за „саботирање“ на проектот бесплатен јавен превоз, ги обвини централната и дел од единиците на локалната власт.
Еден од должниците, на кои алудираше Арсовска одговарајќи на новинарски прашање, е Министерството за образование и наука (МОН) кое му должи два милиони евра на ЈСП од блок дотации за бесплатниот превоз на средношколци.