Владата препорачува организаторите на јавни собири да ги откажат сите настани што се закажани до 6 март, соопштија од владината прес-служба по денешната седница.
„Препораката на Владата се однесува на поголемите јавни собири што се планирани во овој период, како што се Струмичкиот карневал, карневалот ‘Прочка’ во Прилеп и сите слични. Владата им препорачува на организаторите на спортските настани, натпреварите во утврдениот период до 6 март да се играат без публика. Истата препорака на Владата се однесува и на сите други поголеми забавни и културно-уметнички манифестации“,
велат од Владата.
Организаторите, препорачуваат оттаму, пред да донесат одлуки да побараат и мислење од Комисијата за заразни болести.
Пазарната инспекција и Агенцијата за лекови и медицински средства, пак, добија задолженија да направат увид во резервите на аптеките на средствата за заштита од вирусот и ако утврдат дека аптеките несоодветно ги покачиле производите да преземат мерки.
Еден од заклучоците на денешната владина седница е и волонтерите од Црвен крст да се вклучат и да помогнат во анкетирањето на патниците на граничните премини.