Средствата се релоцирани од буџетот на Министерството за образование и наука (МОН), а на сметката на ЈСП ќе легнат до крајот на неделава
Студентите ќе може да го користат бесплатниот автобуски јавен превоз и во претстојната 2025 година откако Владата на последната седница за оваа година одлучи да му префрли 120 милиони денари на Јавното сообраќајно претпријатие Скопје. Средствата се релоцирани од буџетот на Министерството за образование и наука (МОН), а на сметката на ЈСП ќе легнат до крајот на неделава.
„Претходната Влада три години не обезбедуваше средства за оваа намена и немаше донесено ваква одлука. Оттука и недовербата која студентите ја имаа кон извршната власт. Ги уверувам, треба да бидат спокојни, зашто новата Влада ги исполнува ветувањата и обврските кон граѓаните, а токму оваа наша одлука е потврда на тоа“,
изјави премиерот Мицкоски на денешната прес-конференција во Владата.
Бесплатниот јавен превоз, како што додаде, ќе им овозможи на студентите поголема достапност до образованието и ќе ги ослободи од финансискиот товар, за да можат повеќе да се фокусираат на своите студии и личен развој.
„Свесни за фактот што студентите се иднината на нашата држава, но и за тоа дека секојдневно се соочуваат со големи предизвици, високи трошоци за школување, сместување и живот. Во вакви околности, јавниот превоз е еден од главните трошоци за студентите. Затоа Владата одлучи да му префрли 120 милиони денари на Градот Скопје, односно на ЈСП, за да може оваа мерка непречено да се реализира и следната календарска година“,
додаде Мицкоски.
Во однос на повторното повлекување на автобусите на ЈСП од улиците, за што денеска известија дел од медиумите, според премиерот, не е поврзано недостиг на нафта, туку оти се работи за административен проблем. До раководствата на ЈСП и на Град Скопје апелираше да ги надминат, како што рече, меѓусебните несогласувања за скопјани да може да го користат јавниот превоз во градот.
„Од тоа коешто можам да го добијам како информација е дека раководството на Јавното сообраќајно претпријатие не доаѓа на работа. Апелирам и до раководството на ЈСП и до раководството на Градот Скопје да ги надминат меѓусебните несогласувања за да можат скопјани да го користат јавниот превоз, бидејќи овде не станува збор за, колку што јас сум инфомиран, за недостаток на количини на нафта туку едноставно нешто друго е проблемот. Дали не е потпишан договор, дали нешто друго…нека се именува ново лице, или, пак, нека направат нешто затоа што ова веќе ги поминува сите граници на едно однесување кое не треба да се случува“,
изјави Мицкоски.
На новинарско прашање како да се решат проблемите со автобусите во Скопје и со функционирањето на Градот, Мицкоски дека навистина не знае што тие како Влада може да направат повеќе за да помогнат. Додаде дека како Влада немаат ингеренции во оваа смисла, ниту дека може да ги менаџираат јавните претпријатија.
„Така што, до локалните избори, до промена на тимот којшто ќе го менаџира главниот град апелирам на разум, замолувам на разум барем овие месеци како можеме да помогнеме кажете да помогнеме само граѓаните да не ги чувствуваат последиците од лошото менаџирање и меѓусебните конфликти коишто се случуваат“,
додаде премиерот.