На почетокот на денешната собраниска седница е констатирана оставката на Аријанит Хоџа и на заменик-министрите за образование и за култура, чии места веројатно нема да се пополнуваат во наредниот период додека се чека да завршат внатрепартиските избори во СДСМ, по што треба да се формира нова влада во која би партиципирала и Алтернатива
Беса од денеска и формално не е дел од владата на Зоран Заев откако Собранието, на почетокот на денешната седница, ги констатира оставките на министерот за земјоделство Аријанит Хоџа и на заменик-министрите за образование и за наука, Арафат Шабани и Седат Сулејмани.
Тие соопштија дека заминуваат од функциите на 12 ноември откако не успеа иницијативата за изгласување недоверба на Владата, во која учествуваше и Беса, и покрај тоа што оваа партија беше дел од владејачката коалиција по ланските парламентарни избори, на кои настапуваше заедно со СДСМ.
Беса првично најави можно излегување од Владата откако ДИК прифати приговор на ДУИ за гласањето во Желино на неодамнешните локални избори. Потоа, партијата на Билал Касами ја поддржа иницијативата на опозицијата за уривање на Владата, која, всушност, на крајот беше осуетена поради недоаѓањето на пратеникот на Беса Кастриот Реџепи на собраниската седница на чиј дневен ред беше прашањето за доверба на владиниот кабинет.
Мошне извесно е дека министерското место во земјоделство нема да се пополнува во наредниот период додека се чека да завршат внатрепартиските избори во СДСМ, по што треба да се формира нова влада, со друг мандатар, а во која би партиципирала и Алтернатива – партијата која произлезе од Беса и која има четворица пратеници.
Денешната собраниска седница е прва по неуспешниот обид за изгласување недоверба на Владата. На дневниот ред, кој сѐ уште не е усвоен, се четириесетина точки, меѓу кои и буџетот за следната година.
Впечаток е дека, првпат по подолго време, Собранието не се соочува со проблеми со кворумот, веројатно поради присуството на Алтернатива, која до скоро беше во опозицискиот табор, кој често ја опструираше работата на законодавниот дом. Во салата моментно се гласа за точките што треба да се разгледуваат по скратена постапка, за што одлуките цело време се носат со од 61 до 64 гласа „за“.