Пратеникот Кастриот Реџепи, и во интервјуто за „360 степени“, инсистира дека се промениле околностите од моментот кога се потпишал на иницијативата за гласање недоверба на Владата до моментот кога требаше да се одржи собраниската седница, што било причина да реши да не присуствува
Според информациите што ги имам, бројките веќе се обезбедени за да се функционира како мнозинство, но има преговори и со други политички партии кои се поддржувачи на оваа кауза и на овие насоки на Владата, така што наскоро ќе се знае до каде стигнала бројката на поддржувачите, вели Реџепи
Еден од мотивите за потпишување на иницијативата за гласање недоверба на Владата беше ДУИ да замине во опозиција и да има реформирање на институциите, но тоа не се прави по секој цена, вели во интервјуто за „360 степени“ пратеникот Кастриот Реџепи, кој со одлуката да не учествува на собраниската седница во четвртокот спречи паѓање на Владата.
„Прашањето на можната интерпелација за ДУИ внатре или надвор може да се случи и по добивање на датумот за ЕУ, ако нештата не функционираат како што треба, тогаш може да се вратиме на ова прашање. Но, во моментов, не вредеше за една емоција или за едно барање на група граѓани, ние да ја ставиме под знак прашалник судбината и насоката на државата и судбината на граѓаните“,
одговори Реџепи на прашањето зошто не ја овозможил долгоочекуваната катарза во дел од албанската заедница.
Како и на денешната прес-конференција, Реџепи ги објаснуваше околностите под кои решил да се потпише на иницијативата, а потоа донел одлука да не учествува во уривање на Владата. Според Реџепи, тоа е можноста Северна Македонија во декември да ги почне пристапните преговори со ЕУ што, како што вели, сигурно немало да се случи ако паднела Владата.
За Реџепи, кој рече дека продолжува да функционира како пратеник на Беса, за која смета дека сѐ уште е дел од мнозинството зашто релевантните партиски органи не донеле поинаква одлука, прашањето на мнозинството е решено.
„Според информациите што ги имам, бројките веќе се обезбедени за да се функционира како мнозинство, но има преговори и со други политички партии кои се поддржувачи на оваа кауза и на овие насоки на Владата, така што верувам дека наскоро ќе се знае до каде стигнала бројката на поддржувачите. Ќе има мнозинство што ќе може да ги турка процесите напред. Секако, ова е работа на тој што го има мандатот, значи мандатарот“,
вели пратеникот.
Тој нема против евентуално влегување на Алтернатива во Владата.
Прашан дали се чувствува безбеден, Реџепи вели дека ако каже оти не чувствува закани, тоа не е реално, бидејќи имал и закани по живот, кои ги пријавил во институциите.
„Ова го оставам на институциите, ќе продолжам да го правам институционално. Благодарност до тие што ме поддржуваат лично и сакаат да придонесат за мојата безбедност, но нема потреба, државата функционира. Секако, ќе помине и ова. На крајот, тешките одлуки не се кога човек се чувствува комотен, но мора да се направат, бидејќи имаат поголема тежина отколку прашањето за моменталната безбедност, кое мислам дека наскоро ќе помине, како што поминале и други работи. Апелирам до политичките партии, со нивните постапки и изјави, да не ја подгреваат атмосферата врз основа на тоа што се случи со недовербата на Владата, туку да придонесеме сите да спласнат емоциите, да разговараме за подобра иднина на народот и државата заедно,и верувам дека нема да се случи нешто лошо за мене и моето семејство“,
рече Реџепи во интервјуто.
Целиот разговор со пратеникот Кастриот Реџепи може да го погледнете во видеото.