Одлуката на Владата, како што се наведува во соопштението од Илинденска број 2 по седницата, е согласно барањето на Советот на Европа за давање одговор околу овој случај
Владата на денешната 15. седница на предлог на техничкиот премиер Талат Џафери го задолжила Министерството за внатрешни работи (МВР) да достави комплетна информација во врска со случајот со новинарот Фуркан Салиу.
Одлуката на Владата, како што се наведува во соопштението од Илинденска број 2 по седницата, е согласно барањето на Советот на Европа за давање одговор околу овој случај.
Новинарот Фуркан Салиу на 7 април беше приведен за време на фудбалски натпревар во скопско Средно Коњари, бидејќи, како што соопшти МВР, нападнал полициски службеници.
Откако беше пуштен од полициска станица доцна вечерта истиот ден, тој во изјава за медиумите кажа дека бил приведен откако почнал да снима како полицијата тепа момче кое воопшто не учествувало во нередите кои настанале помеѓу двете навивачки групи за време на натпреварот. Тој негираше дека нападнал полициски службеници.
„Го извадив телефонот за да го документирам тоа, затоа што дечкото навистина ништо не направи. Ми го земаа телефонот, ме уапсија мене дека сум пружал отпор, сум нападнал полицаец, ве молам докажете го тоа. Викам во видеото, се слуша, бегај – новинар сум, снимам, 90 отсто од тие полицајци ме знаат“,
изјави Салуи по пуштањето од полициска станица.
Еден ден подоцна, Салиу се соочи со техничкиот министерот за внатрешни работи Панче Тошковски за време на прес-конференција чија главна тема беше токму случајот со новинарот и уредник на Портал „Икс“.
Тошковски тогаш кажа дека од видеоматеријалите од настанот кој тој имал прилика да ги види, Салиу во најмала рака спречил овластено службено лице во преземање одредени дејствија.
На 11 април на прашање на „360 степени“ од Министерството за внатрешни работи одговорија дека против Салиу е поднесена кривична пријава за сторено кривично дело спречување службено лице во вршење службено дејствие.
Оттаму рекоа дека освен за Салиу, до Основното јавно обвинителство (ОЈО) Скопје кривична пријава за истото кривично дело е поднесена и против лице со иницијали Н.Ј.
„Ве известуваме дека по целосно документирање на настанот за кој прашувате, на 11.04.2024 година од страна на Единицата за насилен криминал при СВР Скопје до ОЈО Скопје против лицата Н.Ј. и Ф.С. поднесена е кривична пријава за сторено кривично дело ‘спречување службено лице во вршење службено дејствие по член 382 од Кривичниот законик“,
рекоа од МВР за „360 степени“.
За поднесената кривична пријава се огласи и Салиу преку Фејсбук, кој напиша:
„Само што нè информираа дека МВР поднело кривична пријава за попречување на службено лице по член 382. Најверојатно ќе се бара претрес во просторите на Портал ‘Икс’ и во моето живеалиште. Делото не верувам дека можат да го докажат, меѓутоа најверојатно работата на Портал ‘Икс’ ќе биде оневозможена одреден период.“
Преку фејсбук-објавата Салиу, меѓу другото, упати повик до сите релевантни институции и меѓународни организации добро да внимаваат, како што вели, како ќе се одвива целиот овој случај.