За поднесената кривична пријава во меѓувреме се огласи и самиот Салиу преку Фејсбук. Во објавата тој, меѓу другото, изрази сомнеж дека ќе се докаже дека го сторил кривичното дело кое му се става на товар, но додава дека најверојатно работата на Портал „Икс“, каде што тој е уредник и новинар, ќе биде оневозможена одреден период
Министерството за внатрешни работи (МВР) денеска поднесе кривична пријава против новинарот и уредник на Портал „Икс“, Фуркан Салиу, за сторено кривично дело спречување службено лице во вршење службено дејствие.
Ова во одговор на новинарски прашања денеска за „360 степени“ го соопштија од МВР.
Оттаму велат дека покрај за Салиу, до Основното јавно обвинителство (ОЈО) Скопје кривична пријава за истото кривично дело е поднесена и против лице со иницијали Н.Ј.
„Ве известуваме дека по целосно документирање на настанот за кој прашувате, на 11.04.2024 година од страна на Единицата за насилен криминал при СВР Скопје до ОЈО Скопје против лицата Н.Ј. и Ф.С. поднесена е кривична пријава за сторено кривично дело ‘спречување службено лице во вршење службено дејствие по член 382 од Кривичниот законик“,
велат од МВР за „360 степени“.
За поднесената кривична пријава во меѓувреме се огласи и Салиу преку Фејсбук. Во објавата, тој пишува:
„Само што нè информираа дека МВР поднело кривична пријава за попречување на службено лице по член 382. Најверојатно ќе се бара претрес во просторите на Портал ‘Икс’ и во моето живеалиште. Делото не верувам дека можат да го докажат, меѓутоа најверојатно работата на Портал ‘Икс’ ќе биде оневозможена одреден период.“
Преку фејсбук-објавата Салиу, меѓу другото, упати повик до сите релевантни институции и меѓународни организации добро да внимаваат, како што вели, како ќе се одвива целиот овој случај.
Новинарот Фуркан Салиу во неделата попладне (7 април) беше приведен за време на фудбалски натрепревар во скопско Средно Коњари. Откако беше пуштен од станица доцна вечерта, тој во изјава за медиумите кажа дека бил приведен откако почнал да снима како полицијата тепа момче кое воопшто не учествувало во нередите кои настанале помеѓу двете навивачки групи за време на натпреварот. Негира дека нападнал полициски службеници.
„Го извадив телефонот за да го документирам тоа, затоа што дечкото навистина ништо не направи. Ми го земаа телефонот, ме уапсија мене дека сум пружал отпор, сум нападнал полицаец, ве молам докажете го тоа. Викам во видеото, се слуша, бегај – новинар сум, снимам, 90 отсто од тие полицајци ме знаат“,
изјави Салиу по излегувањето од станица доцна вечерта во неделата.
Еден ден подоцна, Салиу се соочи со министерот за внатрешни работи Панче Тошковски за време на прес-конференција чија главна тема беше токму случајот со новинарот на Портал „Икс“.
Тошковски тогаш кажа дека од видеоматеријалите од настанот кој тој имал прилика да ги види, Салиу во најмала рака спречил овластено службено лице во преземање одредени дејствија.