Прославата на Илинден годинава ќе се одвива според посебни протоколи кои опфаќаат намален број учесници, здравствено-безбедносната организација на местата каде што ќе се одржат свеченостите, транспортот и движењето до локациите и местата за посетителите и учесниците, со обезбедена дистанца и заштита, соопшти Владата.
„За исполнување на препораките од протоколот оваа година содржините на програмите за одбележување се сведени на минимум, само со положување венци со свежо цвеќе на спомен-обележјата, со обраќања, но без традиционалната културно-уметничка програма и без масовни народни собири на граѓани на отворено и во угостителските објекти“,
се наведува во соопштението од Владата.
Годинава се одбележуваат 76-години од Првото заседание на АСНОМ и 117 години од Илинденското востание. Според агендата, претседателот на државата Стево Пендаровски ќе се обрати на свеченоста во Меморијалниот центар во Пелинце, премиерот Оливер Спасовски во Скопје, а манифестацијата во Крушево, на Мечкин Камен, според програмата, треба да ја предводи претседателот на Собранието, Талат Џафери. Не се знае дали неговата здравствена состојба ќе влијае врз промена на вака предвидената агенда.