Во владиното соопштение се посочува дека информацијата е доставена до Владата како материјал за информирање, а за деталите јавноста ќе биде информирана од страна на Министерството за економија, преку прес-конференција
По денешната редовна седница, Владата информира дека ја разгледала информацијата подготвена од Министерството за економија во која е објавена споредбена анализа за потрошена електрична енергија од државните институции.
Во владиното соопштение се посочува дека информацијата е доставена до Владата како материјал за информирање, а за деталите јавноста ќе биде информирана од страна на Министерството за економија, преку прес-конференција.
„Министерството за економија беше задолжено да достави ваква информација и анализа до Владата, откако органите на државната управа, институциите коишто немааат статус на органи на државната управа и правните лица основани од државата, преку Генералниот секретаријат на Владата, беа задолжени да остварат заштеди во потрошувачката на електрична енергија. Задолжението се однесуваше на заштеди од 15 отсто на месечно ниво, започнувајќи од 1 септември 2022 година – заклучно со 31 март 2023 година, споредено со истиот месец од претходната календарска година“,
потсетуваат од владата.
Министерот за економија Крешник Бектеши неодамна се пофали дека според податоците во септември годинава споредено со истиот месец лани државните институции потрошиле за 18 отсто помалку електрична енергија.
Мерките за штедење електрична енергија стапија на сила од 1 септември, а беа донесени со владина одлука на 16 август, а ќе важат до 31 март 2023 година.
Целта на мерките за штедење е да се намали потрошувачката на електрична енергија за 15 отсто.
Мерките се однесуваат на домаќинствата и компаниите како препораки, а за државните институции се задолжителни.
Исклучување на декоративното осветлување на фасадите на јавните објекти и културните споменици, гаснење светилките кога има доволно дневна светлина, ладење со клими не помалку од 27 степени и греење на максимум 20 степени, исклучување на компјутерите по завршување на работните обврски, редовно менување на филтрите на грејните тела и клима уредите, печатење само на потребните материјали, замена на прозорците со енергетски ефикасни, се само дел од обврските кои државните институции мора да ги спроведат.