За бескомпромисна борба против корупцијата ја подигнавме отчетноста и транспарентноста на институции на извршната власт, која треба да биде зајакната и со независни, транспарентни и отчетни судство и обвинителство, со непартизирана антикорупциска комисија. Владата останува да се раководи од ставот дека отворените податоци се силен поттик и дополнително ги јакнат доброто управување, транспарентноста, интегритетот и со јавното учество на граѓаните и другите засегнати страни во креирањето на политиките, се вели во реакцијата од Владата за Индексот на перцепција на корупцијата што денеска го објави „Транспаренси интернешнел“, каде што Северна Македонија бележи пад од 13 места во споредба со лани.
Во соопштението од владината прес-служба се истакнува дека сите преземени реформи и оние што се спроведуваат се во насока на создавање силни и независни институции и механизми за борба против корупцијата за да се врати довербата на граѓаните во институциите на системот, при што се набројуваат и повеќе резултати:
– Според последното истражување на „Action SEE“ за транспарентност, отвореност и отчетност на извршната власт во регионот на Западен Балкан објавено минатата година, Владата на Република Северна Македонија, заедно со Црна Гора се издвојуваат во регионот според индексот на отвореност, кој изнесува 78% во однос на исполнување на индикаторите;
– Во последните две години има пресврт во рангирањето на нашата земја, ако се знае дека во 2016 година бевме на последното место со само 52% исполнети индикатори;
– Донесена е законска регулатива која на Државната комисија за спречување на корупцијата – од започнувањето со функционирање во новиот состав минатиот февруари, ѝ создаде солидно досие на покренати случаи, вклучително и покренати иницијативи за утврдување на кривична одговорност за актуелни носители на јавни функции како и поништени решенија за вработување;
– На 17 јануари ДКСК ја донесе петгодишната национална стратегија за спречување на корупција чии цели се зголемување на нивото на политичка одговорност, спречување на политичкото влијание, јакнење на интегритетот и транспарентноста при вработување во јавниот сектор кое треба да се базира на квалитет, јакнење на надзорните и контролните механизми и намалување на корупцијата во јавните набавки и доделувањето на грантови.
– Минатата година усвоена е Стратегијата за транспарентност на Владата на Република Северна Македонија за периодот 2019-2021 година, со Акциски план, за унапредување на амбиентот за транспарентност и доверба во работата на институциите;
– Со порталот „Отворени финансии“ оваа влада го отвора државниот Трезор на Министерството за финансии, и на увид на јавноста ги става сите минати, сегашни и идни финансиски трансакции, на буџетските корисници од Буџетот на Република Северна Македонија. Сите идни ќе се прикажуваат на секои 15 дена;
– Преку порталот „Отворени податоци“ го овозможивме максимално учеството на граѓаните при креирањето на политики и при анализа на испорачаните резултати, со што за прв пат во политичката историја на Република Северна Македонија, Владата, самоиницијативно, на увид на граѓаните ја стави можноста да го следат и анализираат трошењето на средствата на граѓаните од страна на владините функционери.
Од Владата истакнуваат дека остануваат посветени на реформите во борба против корупција, и ќе продолжи имплементација на механизмите кои овозможуваат правично функционирање на системот.
*Поврзана вест
Ивановска: Граѓаните ќе веруваат повеќе во институциите ако се реши „Рекет“