Во однос на уставните измени, тој истакнува дека доколку се гледа технички, односно од внатрешниот аспект поврзан со уставниот поредок, тогаш нема никаков проблем кои било измени на Уставот и кои било амандмани да се усвојат на начин што ќе имаат одложена примена. Меѓутоа, тука е и политичкиот аспект или, како што посочува професорот, преземените меѓународни обврски на владата според кои уставните измени треба да се реализираат меѓу првата и втората меѓувладина конференција
Исклучување на ДУИ од Владата не е полезно за стабилноста и за полесно надминување на политичките предизвици, смета професорот по уставно право и политички систем, Александар Спасеновски, во интервју за Радио Слободна Европа (РСЕ).
Според неговиот одговор на прашањето дали е можно формирање широка влада без ДУИ, тоа само ќе ги комплицира работите.
„Доколку јас се прашувам, сметам дека во услови на сериозни политички предизвици, какви што впрочем се евентуалната блокада, евентуалниот застој на европските интеграции, или лошите билатерални односи со Бугарија или променетата геополитика, сметам дека најмалку што ѝ е потребно на оваа држава е дополнително комплицирање на приликите и со нов внатрешно-политички проблем, како резултат на исклучување на една важна политичка партија од учество во власта во државата. Така што, од аспект на поводите за барањата на ВМРО-ДПМНЕ за исклучување на ДУИ можеме да најдеме причини, меѓутоа од аспект на тоа дали ваквото решение придонесува или одмага, мојот заклучок е дека тоа не е полезно за стабилноста на државата и за евентуално полесно и подобро надминување на политичките предизвици со коишто се соочуваме во моментов“,
вели професорот за РСЕ.
Спасеновски во интервјуто го изнесува својот став и за другото барање на ВМРО-ДПМНЕ – уставните измени да се усвојат сега, а да важат од моментот кога земјата ќе влезе во ЕУ.
Тој истакнува дека доколку се гледа технички, односно од внатрешниот аспект поврзан со уставниот поредок, тогаш нема никаков проблем кои било измени на Уставот и кои било амандмани да се усвојат на начин што ќе имаат одложена примена. Меѓутоа, тука е и политичкиот аспект.
„Од друга страна, секако тука оваа техничка реалност се надоврзува на една политичка ситуација, а таа се поврзува со преземените политички обврски на државата. Минатата година, кога практично и отпочна овој процес на динамизирање на европските интеграции, според кој државата презема обврска да ги заврши уставните измени меѓу првата и втората меѓувладина конференција. Значи, да заклучиме, од технички, од уставно-правен аспект не постои проблем кои било уставни измени, вклучувајќи ги овие, да имаат одложено дејство, одложена примена, меѓутоа тука се судруваме со реалноста на политиката, а тоа се преземените меѓународни обврски на владата според кои уставните измени треба да се реализираат меѓу првата и втората меѓувладина конференција“,
вели Спасеновски.
Целото интервју можете да го погледнете ТУКА.