Жителите на скопско Средно Коњари, поддржани од месните заедници во околината, денеска повторно протестираа против површинскиот ископ на песок во нивното село. Тврдат дека поради ископот за кој концесија добила една приватна фирма, штета трпи целото село. Тие успеаја во намерата, барем денеска, со бркање на камионџиите и багеристите да го запрат ископот.
-Неконтролирано и незаконски се ископува песок, а со тоа се уништуваат природните добра и се доведуваат во опасност куќите, бидејќи се копа во населено место. Се уништува екосистемот, подземните води спаѓаат, ја снемува водата за пиење. Додека не ја стопираат целосно работата, ние ќе протестираме – реагираат од месната заедница на село Средно Коњари.
Овде багерите копаат површински, во нива, каде песокот се смета за минерална суровина, па концесијата за експлоатација е во надлежност на Министерството за економија. Жителите обвинуваат дека се уништува плодно земјиште.
Од Министерството за економија велат дека добиле претставка од локалното население, но се уште го чекаат извештајот од Државниот технички инспекторат за да одлучат дали фирмата ќе биде санкционирана.
На денешниот протест се приклучија и жителите на Горно Коњари во знак на солидарност. И тие со години наназад алармираа дека трпат штета поради ископот на песок од реката Пчиња. Таму активностите на терен се стопирани и покрај тоа што реката не е уредена, оти на ангажираната фирма ѝ истече дозволата.
Во Горно Коњари дозвола за речен ископ со важност до декември 2019 г., имаше фирмата „Прогрес Компани“, чиј сопственик е Ќазим Османовиќ. Во другата фирма „Еуро Прогрес“, која копа површински во соседното село, Средно Коњари, Ќазим Османовиќ е управител, а сопственик е Ријад Османовиќ.
Фамилијата живее во Долно Коњари и велат дека не би си правеле штета самите на себе.