Пандемијата уште повеќе го обедини Западниот Балкан создавајќи заедничка свесност дека хуманоста има предност пред политиката, рече македонскиот премиер
Првпат од почнувањето на Берлинскиот процес, кодомаќини се една земја кандидат од регионот и соседна земја членка на ЕУ. Тоа е јасен доказ дека регионот силно го прифати овој процес како свој и дека со оваа соработка Северна Македонија и Бугарија обезбедија извонредна платформа за понатамошно негување на билатералните односи, рече македонскиот премиер Зоран Заев во поздравното обраќање на лидерскиот Самит за Западен Балкан, во рамки на Берлинскиот процес.
Заев стави посебен акцент на новата динамика во процесот на пристапување на земјите од Западен Балкан во ЕУ, особено по мартовскиот Европски совет со обновената преговарачка методологија и одлуките за започнување преговори со Северна Македонија и Албанија и загрепскиот самит во мај, како и со пакетот за проширување од Европската комисија оваа есен и со сериозниот економски и инвестициски план.
Заев додаде дека заедно со напорите на германското претседателство со Европскиот совет таа динамика е извонредна можност регионот на Западен Балкан сигурно да напредува кон ЕУ.
„Верувам дека имаме обновен импулс и очигледна политичка поддршка за процесот на проширување и за спроведување на пристапните преговори. Треба да ја зграпчиме оваа шанса и да ја искористиме за доброто на сите граѓани“,
истакна премиерот Заев.
Со најавените дури две милијарди евра за грантови, надополнети од новиот инструмент за гаранции за Западен Балкан, со кој треба да се зголемат инвестициите до 20 милијарди евра, ЕУ исто така храбро ја потврди својата поддршка на Западен Балкан. Заев додаде дека овој пакет ќе обезбеди голема финансиска поддршка за нашите реформски процеси и за економска трансформација на регионот.
„Многу сум задоволен дека денеска ќе имаме можност да дискутираме за клучните стратегиски насоки за нашиот регион, за визијата за заедничкиот регионален пазар и за Зелената агенда за Западен Балкан. Поддршката за двете иницијативи преку декларациите на лидерите од Западен Балкан треба да го поттикнат развојот во регионот, но исто така и да се осврнат на некои од актуелните еколошки и здравствени предизвици, со огромен потенцијал за раст и креирање на нови работни места“,
нагласи Заев.
Тој рече дека основите за економската, социјалната и зелената трансформација на нашиот регион за наредите години се цврсто утврдени, и дека регионот исто така ја покажа својата зрелост и отпорност за време на оваа пандемија.
„Пандемијата уште повеќе го обедини Западниот Балкан во борбата против овој невидлив непријател, донесувајќи толеранција и соработка и создавајќи заедничка свесност дека хуманоста има предност пред политиката“,
истакна премиерот Заев.
Тој додаде дека за време на заедничкото кодомаќинство со Берлинскиот процес оваа година дополнителен поттик добија и неколку други процеси како што е регионалниот договор за патување со лична карта, проширувањето на зелените ленти на Западен Балкан кон коридорите на ЕУ и јакнењето на соработката на полето на здравството како регионален одговор на пандемијата, како и соработка со граѓанското општество, особено на прашањата поврзани со младите.
„Убеден сум дека со постигнатите резултати во текот на оваа година успеавме да ја збогатиме регионалната соработка и да го приближиме регионот кон ЕУ“,
нагласи Заев.
Покрај Заев и бугарскиот премиер Бојко Борисов, на отворањето на лидерскиот Самит за Западен Балкан во Софија се обратија и германската канцеларка Ангела Меркел и претседателката на Европската комисија Урсула Фон дер Лајен.
Во македонската делегација во Софија се и вицепремиерите за економија и за европски прашања, Фатмир Битиќи и Никола Димитров, и министерот за надворешни работи Бујар Османи.