Ги повторија своите барања за потпишување колективен договор за кој постигнаа согласност со Министерството за правда, а со него се предвидува 30 отсто повисоки плати и 50 отсто од просечната плата за К-15
Како што и најавија, вработени во Управата за матични книги организирани Независниот синдикат одржаа протест пред Министерството за финансии поради што дел од центарот на Скопје беше блокиран. Марјан Ристевски, претседател на Конфедерацијата на синдикални организации на Македонија (КСОМ), рече дека револтот кај вработените е голем поради тоа што досега никој не ги повикал од Министерството да разговара со нив, иако барањата се упатени уште на 13 мај.
„Револтот е голем. Се надеваме дека од МФ ќе нè повикаат на разговор, тоа им е и обврска кога гледаат дека граѓаните реагираат, тие се платени за тоа, и да ни кажат што се случува со оваа категорија вработени – има при, нема пари, има толку, онолку. И ние сме луѓе, да најдеме заеднички јазик“,
вели Ристевски.
Тој тврди дека се штрајкува и не се издаваат документи и поради тоа има голема нервоза кај вработените и ги обвини институциите за игра на нерви, на издржливост. Но, вели дека нивното трпение е при крај и ако не добијат одговор наскоро имаат намера да организираат голем протест.
„Најверојатно имаат некоја стратегија, но да ни кажат дали сметаат на Независниот синдикати. Доколку и натаму не реагираат, револтот е голем и од контактите со сите синдикати во Конфедерацијата, доколку бидеме предизвикани, следниот чекор ќе биде масовен протест најверојатно пред Владата. Сите институции ги поминавме и остана уште премиерот Ковачевски. Се надевам дека тој ќе собере сили да разговараме и да видиме кои се ставовите“,
рече Ристевски.
Вели дека меѓу вработените има луѓе со преку 30 години стаж, низ чии раце поминуваат сите податоци, од раѓање до промени, па сè до смрт, дека работат со класифицирани податоци и дека тие биле меѓу најангажираните за време на пописот бидејќи кај нив се сите тие податоци.
Ги повторија своите барања за потпишување колективен договор за кој постигнаа согласност со Министерството за правда, а со него се предвидува 30 отсто повисоки плати и 50 отсто од просечната плата за К-15.
Од Независниот синдикат немаат пресметка за колку пари се работи, освен дека бројот на вработени е околу 500.