Штрајкот се очекува официјално да заврши во среда и сите деца и ученици да се вратат во градинките и училиштата
После нова рунда преговори Владата и СОНК, конечно, постигнаа договор, според кој, наставниците ќе добиваат за 12 отсто повисоки плати, а покачувањето можат да го очекуваат најдоцна до јули, информираше првиот човек на синдикатот, Јаким Неделков.
„После повеќе од три часа, би рекол, тешки, макотрпни преговори со министерот за образование и наука и министерката за труд за социјална политика, секако, и премиерот, извршивме сериозни анализи на нашите барања кои беа доставени до ресорните министертва, од една страна, а од друга страна, и аргументите на Владата и министерствата. Сепак, се усогласивме со ставовите, во рамките на можностите на државата, дојдовме до заеднички процент на покачување на платите, кое би се случило најдоцна до месец јули. Се работи за 12-процентно покачување на платите плус додатоците кои следуваат со Колективниот договор“,
изјави Неделков.
Тој, сепак, не прогласи крај на штрајкот, бидејќи, како што рече, најпрво ќе треба да се информира членството за договорениот процент за покачување на платите, но истакна и дека од среда веќе може да се очекува враќање на децата и учениците во градинките и училишните клупи.
Министерот за образование и наука, Јетон Шаќири, како и министерката за труд и социјална политика, Јованка Тренчевска, исто така, изразија надеж дека од среда образовниот процес ќе се врати во нормала.