Вработените во судската администрација денеска преку протест побараа повисоки плати, како и ветените додатоци на плати за кои велат дека сè уште не се исплатени. Претседателот на Независниот синдикат на државната администрација, Горан Ристевски, вели дека овој протест доаѓа откако Судскиот совет не покажал интерес за нивните барања.
„Ние како независен синдикат учествуваме и во предлог-измените на Законот за судска служба, воедно овој период во неколку наврати комуницираме и имаме состаноци со претседателот на Судскиот совет кому му ги кажавме потребите за брзо и навремено регулирање на додатоците на плата во согласност со правилникот за додатоци за плата, но бидејќи во рамките на Судскиот совет немаше слух, моравме да организираме протест, а ќе следува и уште еден ако не се уважат нашите барања“,
рече Ристевски.
Претседателката на Независниот синдикат на судската служба Јасмина Величковска порача дека иако претседателот на Судскиот совет им ги ветил додатоците тоа не го исполнил.
„Ние како судска служба бевме на состанок минатата недела кај претседателот на Судски совет кој ни вети дека ќе има додатоци, но истиот ден беа изгласани додатоци за неговата служба, за судската служба на Судскиот совет и за Академијата на судии и обвинители, а за нас само 5%, а немаме одлука ниту за тие 5%. Тоа е понижувачки бидејќи Судскиот буџетски совет се полни од наши средства, а не од вработени во Судскиот совет. Оттука, нема никаква логика 25% да добијат неговите вработени, а 5% ние, сите вработени во судовите во Македонија“,
вели Величковска.
Претседателот на Синдикатот на УПОЗ, Трпе Дејановски, вели дека вработените имаат право на додатоци на плата за висок ризик, за доверливост, за посебни работни услови.
„Со години наназад предупредуваме и велиме само една работа – не зголемувајте ги платите на судиите и на обвинителите без да ги зголемите платите на вработените. Со години наназад штрајкуваме и протестираме по судовите и обвинителствата и со години наназад не не разбираат, не може за едни мајка, а за други маќеа. Трпението на овие луѓе зад нас е при крај и тие додатоци, кои ги имавме, веќе ги немаме. Ова, како што кажав, е предупредување – доколку во најбрз временски рок не се решат овие проблеми, не се решат платите и не се решат додатоците, овие луѓе зад нас, а и колегите од државната управа, се спремни да престанат со работа од септември“.
вели Дејановски.
Вработените во судската администрација се револтирани и со одлуката на Уставниот суд со која платите на избраните и именуваните лица се зголеми за 78 проценти.