Репрезентативците Горан Пандев и Илија Несторовски, во изјави за „360 степени“, велат дека се изненадени од ваквото барање на ФФМ, кое го сметаат за срамно и некоректно
За да го превенираат објавувањето на сторијата на „360 степени“, од ФФМ пред малку (околу 17:15 часот) на фејсбук-страницата на фудбалската репрезентација објавија дел од химната во кој се слуша стихот со селекторот Мрме што би требало да значи дека Мухамед Сејдини се предомислил
Фудбалската федерација на Македонија (ФФМ) нарачала химна со која ќе се бодрат репрезентативците на претстојното Европско првенство. Но, еден стих од песната не му се допаднал на претседателот на ФФМ, Мухамед Сејдини, поради што побарал да бидат променет. Станува збор за стихот во кој се спомнува селекторот на репрезентацијата, Игор Ангеловски, со неговиот прекар Мрме. Стихот гласи: „Мрме на чело на црвена армија, те слави Македонија“, а барањето на Сејдини било да го нема селекторот во песната.
Ваквото барање предизвикало револт кај дел од фудбалерите, меѓу кои и кај Горан Пандев и Илија Несторовски. „360 степени“ ги контактираше двајцата репрезентативци, кои велат дека се изненадени од ваквата постапка на Фудбалската федерација и ја сметаат за срамна и некоректна.
„Како можат да се дрзнат да го тргнат селекторот или некои играчи од химната, тоа е некоректно и жално. Мислам дека стигнала оваа порака до Федерацијата и мислам дека треба добро да размислат пред тоа да го направат. Но, тоа е за секоја осуда. Ја покажаа нивната некомпетентност, нечовечност. Нема да биде коректно да го тргнат селекторот. Ајде, да ги ставиме тогаш луѓето од Управен одбор во химната, дека тие се најзаслужни што се пласиравме на ЕП. Треба да разберат дека ова е репрезентација на сите, а не нивна“,
вели Горан Пандев за „360 степени“.
Присутен на снимањето на делови од спотот за химната бил и репрезентативецот Илија Несторовски. Бил сведок на непријатна ситуација. Сепак, се надева дека, на крајот, песната ќе остане без измени.
„Ние играчите бевме повикани да снимаме спот за таа песна. Кога пристигнавме на стадион, не пречекаа Пеце Суперхикс и неговата група – се беше спремно за снимање. Во еден момент почнаа да му објаснуваат на селекторот дека од Федерацијата е побарано да биде тргнат делот во кој се спомнува Мрме. Навистина останавме вчудовидени, не очекувавме таква ситуација, бидејќи знаеме дека тие резултати се постигнати на чело со сегашниот селектор. Снимавме еден дел со него и без него, не знаеме уште како ќе биде. Се надевам дека ќе заврши оваа игра и човекот ќе добие внимание поради сите резултати што ги направи за Македонија“,
вели Несторовски за „360 степени“.
Став побаравме и од селекторот Игор Ангеловски – Мрме, зад кој застанаа дел од фудбалерите. За него е несфатливо зошто е трн во очите на Федерацијата кога, како што вели, испорачал најдобри резултати досега во фудбалската историја.
„Нека им служи на чест на тие што сакаат да го направат тоа. Не побарав одговор од претседателот на Федерацијата, тоа е негов начин на однесување и капацитет на водење. Јас сум професионалец и селектор на фудбалската федерација на Македонија“,
коментираше Ангеловски.
Го прашавме – дали постои антагонизам меѓу него и Сејдини?
„Па, мислам дека треба да процените сами. Ако Горан Пандев во едно интервју пред две години кажа дека пред баражите посакал да ме смени и таа идеја долго време провејува во јавноста од нивна страна… Јас кон него немам никаков антагонизам, јас ги испорачав најдобрите резултати во историјата на македонскиот фудбал, во времето кога тој е претседател. За другото, треба тој да одговори“,
вели Ангеловски за „360 степени“.
„360 степени“ побара став и од претседателот на ФФМ, Мухамед Сејдини, во врска со овој случај. Од вчера неколку пати комунициравме со тимот за односи со јавност на ФФМ. Последниот пат кратко ни одговорија дека текстот на химната нема да биде променет.
За да го превенираат објавувањето на сторијата на „360 степени“, од ФФМ пред малку (околу 17:15 часот) објавија дел од химната во кој се слуша стихот со селекторот Мрме што би требало да биде потврда дека Мухамед Сејдини се предомислил.