fbpx
Свет

(ВИДЕО) Силно невреме ја зафати Европа, шест лица загинаа, меѓу нив и едно дете, сообраќајот е во колапс

360степени | 2 ноември, 2023 19:49

Во невремето на северот на Франција, покрај еден загинат, 16 лица, меѓу кои седум пожарникари, се повредени. Во Франција околу 1,2 милиони домаќинства останаа без струја, најмногу во Бретања – 780 000

Невремето Сиаран, кое денеска ја погоди Западна Европа, однесе најмалку шест животи, меѓу кои и петгодишно дете во Белгија, и предизвика сообраќаен хаос – затворање на пристаништата и одложување на бројни летови.

Поради паѓањето на дрвја, предизвикано од силниот ветер, загинаа шест лица: две во Белгија и по едно во Шпанија, Франција, Германија и Холандија.

Железничкиот сообраќај во Фландрија беше делумно во прекин, а возовите во Белгија сообраќаа со намалена брзина. Во Антверпен е во прекин поморскиот сообраќај, а на аеродромот во Брисел владее сообраќаен хаос, со одложени летови и долги доцнења.

Во невремето на северот на Франција, покрај еден загинат, 16 лица, меѓу кои седум пожарникари, се повредени. Во Франција околу 1,2 милиони домаќинства останаа без струја, најмногу во Бретања – 780 000.

Невремето силно го погоди и југот на Англија, поради што беа откажани бродските и траектните линии од Довер. Затворени се и околу стотина училишта.

Црвено предупредување е издадено на островот Џерси поради ветровите кои дуваат со брзина од 160 км/ч. Сите летови од аеродромите Џерси, Гернзи и Орињи се откажани.

Околу 200 летови беа одложени на аеродромот во Амстердам

Портокалово предупредување е на сила во Холандија, со ветрови кои достигнуваат брзина од 110 километри на час. Околу 200 летови беа одложени на аеродромот Шипхол во Амстердам.

Во западна Франција, железничкиот сообраќај е затворен до петок, а брзите возови (TGV) меѓу Париз и Ле Ман и Париз и Нант исто така не сообраќаат.

Ноќта од среда кон четврток во Бретања се забележани ветрови со брзина од 200 километри на час.

Во Баскија измерени бранови високи меѓу осум и девет метри

Во Шпанија, Галиција, на северозапад, беше најпогодена од невремето, а на сила е црвено предупредување, како и во Баскија, каде беа измерени бранови од осум до девет метри.

Иако Португалија не беше директно погодена, властите објавија црвен аларм во крајбрежните области на северот на земјата.

Фото: EPA-EFE/Stuart Brock

©2023 360 степени, Сите права се задржани