fbpx
Свет

(ВИДЕО) Шумски пожар во близина за турскиот град Бодрум, се гаси и од воздух и од земја

360степени | 14 јули, 2023 22:50

Пожарот од непозната причина избувнал во шумскиот предел на раскрсницата што води кон аеродромот

Шумски пожар избувна во областа во близина на меѓународниот аеродром Милас-Бодрум, во југозападниот дел на Турција.

Како што пренесуваат турските медиуми во тек се воздушни и копнени интервенции со цел пожарот да се стави под контрола. Регионалната управа за шумарство „Мугла“ има испратено екипи за брза контрола и гаснење на пожарот.

Пожарот од непозната причина избувнал во шумскиот предел на раскрсницата што води кон аеродромот. Противпожарните екипи се во близина на меѓународниот аеродром во Бодрум, каде што над огнот кој ја зафатил вегетацијата се извива густ чад.

За гаснењето на пожарот активирани биле девет хеликоптери и исто толку авиони на Подрачното шумско стопанство „Мугла“, 35 цистерни за вода, четири дозери, а на терен се и над 300 лица кои го гаснат пожарот од копно.

Како што пренесуваат медиумите, шумски пожари имало во местата Урла во Измир, Мугла кај Бодрум, Дурсунбеј во Баликесир и Дулкадироглу во Кахраманмараш. Под контрола се ставени пожарите во Урла, Бодрум, Дурсунбеј и Дулкадироглу.

Во гаснењето на пожарот, во вечерните часови, интервенирал и хеликоптер оспособен за ноќно летање.

Локалните власти во Мугла велат дека постарите граѓани се евакуирани како мерка на претпазливост за да не бидат зафатени од чадот.

©2024 360 степени, Сите права се задржани