Србија во недела на 21 јуни ќе гласа на парламентарни избори, а предизборната кампања ги одбројува последните денови.
Денеска, партијата Српска напредна странка (СНС) на претседателот Александар Вучиќ објави нов видео спот во кој ги предупредува граѓаните што ќе се случи доколку не излезат да гласаат, додека од друга страна дел од опозицијата води кампања за бојкот на изборите.
Ако седат дома и не излезат да гласаат на изборите за листата „За нашите деца“ на Александар Вучиќ, се вели во спотот, останатите опозициски партии ќе се обединат и ќе формираат влада. Тоа ќе значи пропаст на економијата, губење на работните места…
„Кога ќе сфатите дека сте направиле голема грешка, јасно ќе ви е дека не можете да ја платите киријата. Кога нема да може да ја платите киријата, единствено што ви преостанува е да направите времеплов, да се вратите назад во времето и да гласате. Кога ќе го искористите времепловот случајно ќе се вратите во далечното минатото и ќе ве изеде диносаурус. Зошто би сакале да ве изеде диносаурус? Не останувајте во минатото, гласајте за иднината“,
гласи дел од нарацијата во спотот.
Спотовите на СНС во оваа изборна кампања предизвикаа низа реакции. Во еден од нив се зборува за тоа дека Србите сега можат да отидат во Грција за 4 часа по автопат, а на крајот од тој спот жена во рацете држи фотографија од Вучиќ и вели „сагапо“.
Еден од спотовите во кој се појавува и самиот Вучиќ, пак, беше забранет бидејќи во него имаше малолетно дете на кое српскиот претседател му ветува дека ќе го врати нејзиниот татко од печалба во Германија. Регулаторното тело за електронски медиуми (РЕМ) го забрани поради злоупотреба на деца во политичка кампања.