Поради ситуацијата, велешките пожарникари се фокусирани на заштита на селата Добриново и Тисовица од огнената стихија, изјави денеска директорот на Дирекцијата за заштита и спасување (ДЗС)
Ангелов објави и видеоснимка од огнишето за подготовка за скара што вчера го затекнал покрај брегот на реката Треска. Тој со доза на револт укажува на несовесното однесување на дел граѓаните, кои, како што додава, и покрај апелите, продолжуваат да палат оган на отворено и покрај ситуацијата со пожарите
Од 25 пожари, колку што беснееле во текот на вчерашниот ден, во текот на ноќта 21 се изгаснати, додека четири и понатаму се активни и противпожарните екипи продолжуваат со нивно гасење и ставање под контрола и денеска. Ова попладнево во видеоизјава го соопшти директорот на Дирекцијата за заштита и спасување (ДЗС), Стојанче Ангелов, кој покрај информацијата за состојбата со пожарите укажа и на негативен пример на кој наишол вчера покрај реката Треска, каде затекнал огниште за подготвување скара што било користено најверојантно еден ден претходно.
Што се однесува до пожарите, како што информира Ангелов, и понатаму е активна огнената стихија која неколку дена гори на територијата на Општина Македонски Брод, во атарот на селото Драгов Дол. Сепак, според директорот на ДЗС, овој пожар е значително намален и очекува наскоро да биде целосно изгаснат.
„Благодарение на полицискиот хеликоптер којшто вчера цел ден работеше, но и трите ‘ертрактори’, повеќе негови краци се успешно изгаснати и останува само еден дел на карпест терен каде што е исклучително тешко и ризично да се движат луѓе, но јас сум оптимист дека овој пожар наскоро ќе биде целосно изгаснат“,
вели Ангелов.
Тој додава дека од пожарот не е загрозено ниту едно населено место.
Инаку, вчера во овој регион беше драматично во пределот на селото Локвица, длабоко во планината во правец кон ловиштето „Јасен“.
И понатаму, според Ангелов, како и според Центарот за управување со кризи, е активен пожарот во атарот на селото Рамни Габер во општина Студеничани, каде што горат трње, грмушки, габер, неквалитетна шума. Огнената стихија е на исклучително тешко пристапен, а на некои места и апсолутно непристапен терен, на кој е невозможно да се пристапи со возила.
Во неговото гаснење се ангажирани екипи на скопската Противпожарна бригада.
Пожарот кој започна во атарот на селото С’лп, на територијата на Општина Велес, според Ангелов, е проширен и се движи во насока на Зеленково, односно во атарот на селата Добриново и Тисовица. Поради ситуацијата, велешките пожарникари се фокусирани на заштита на овие села од огнот.
„Примарна цел на велешките пожарникари е обезбедување на овие села. Утрово од нив добив фотографии и видеа како ползат низ густите грмушки во обид да се пробијат и да направат одбрана и на овие села. Во најголем дел гори неквалитетна шума, грмушки и трња“,
вели Ангелов.
На територијата на општина Јагиновце, како што информира тој, сè уште е активен пожарот над селото Копанце, но не претставува опасност за блиските села.
Еден крак од овој пожар, според информациите, навлегол кон селото Бојане во општина Сарај, односно се движи во насока кон Скопје, а од огнот е зафатена мешана шума, но претежно станува збор за грмушки, трња и сува трева.
Според директорот на ДЗС, активен е пожарот и на депонијата во Кратово.
„Утрово зборував со градоначалникот (на Кратово), се работи на нејзино затрупување и очекувам денеска да биде целонсо затрупано и со тоа непријатната миризба што се шири целосно да исчезне“,
изјави директорот на ДЗС.
Според последниот извештај на Центарот за управување со кризи (ЦУК), активен е и пожарот во населбата Балканска во Општина Штип, каде што гори ниска вегетација, додека според Центарот под контрола е пожарот во Општина Кратово, кај селото Железница, како и оној во Општина Делчево, каде, исто така, гори депонија.
Една искра е доволна за катастрофа
Инаку, Ангелов објави и видеоснимка од огништето за подготовка за скара, што вчера го затекнал покрај брегот на реката Треска. Тој со доза револт укажува на несовесното однесување на дел граѓаните, кои, како што додава, и покрај апелите, продолжуваат да палат оган на отворено.
„Движејќи се покрај реката Треска, во близина на местото каде полицискиот хеликоптер полнеше вода од монтираниот базен, наидов на огниште со решетка, на која некој најверојатно еден ден претходно правел скара. Значи, неколку несовесни рибари и покрај сите наши апели, и покрај сите наши молби и укажувања, правеле скара покрај реката, а веднаш покрај самата скара има сува трева, суви гранки и грмушки. Овој пожар можеше да замине во блиската шума каде во близина исто така има и борова шума“,
раскажа Ангелов.
Тој повторно упати апел до граѓаните да не палат оган на отворен простор бидејќи, како што посочи во видеото, доволна е само една искра за да се случи катастрофа.