Летоска, полицајци апсеа полицајци во викендица во кратовското село Куклица, поради групирање спротивно на мерките за заштита од ковид-19. Полицаец, симпатизер на СДСМ, честел за прва плата во викендичка на колега, симпатизер на ВМРО-ДПМНЕ. Неколку месеци подоцна еден од славениците, за „360 степени“, призна морална, но не и кривична одговорност за собирот. Сега во судска постапка се обидуваат да докажат дека нивните колеги не смееле да ги апсат на приватен имот.
„Во моментот на апсењето не постои уредба за организирање прослави на приватен имот, што е и сега во моментот, Владата кога правеше обиди за приватен имот, не им успеа, бидејќи било противуставно. Епа, ако е противуставно сега, било противуставно и пред неколку месеци“,
ни кажа еден од апсените полицајци во декември минатата година.
Во случајот, остана нејасно кој побарал полициска интервенција. Куклица е село од разбиен тип, а единствениот близок сосед кажа дека во нивна одбрана ќе се појави и на суд.
„Се собраа тука дента неколку луѓе, нормално, како секој ден, немало никаква причина за пријава за вознемирување“,
кажа соседот Костадин Ефремов.
Но, сторијата која навидум е комична, добива сè посериозни димензии. Еден од уапсените тврдеше дека акцијата во Куклица е одмазда за казна за нерегистрирано возило на заменик-командирот, член на спротивставен политички табор. Сега петмина од групата уапсени добиле и прекоманда.
„Вкупно 5 полициски службеници од таа група се преместени на работа, сите во Куманово“,
вели еден од службениците.
„Прекомандата“, сама по себе, не е новина оти Законот за внатрешни работи предвидува дека секој вработен, по потреба, може да биде пратен на работа надвор од местото на живеење и до шест месеци, но тоа може да се случи само еднаш во четири години.
Тоа не е случај со сите кратовски полицајци, кои добиле трајни решенија. За еден од нив ова е трето преместување за помалку од четири години. Првпат, во 2017 г. неколку месеци работел во Куманово, што го смета за единствено регуларно преместување. Две години подоцна, во 2019, е распореден во Танушевци.
„Кои итни и неодложни задачи ги извршувал Александар во Танушевци? Тоа е апсурд, тоа е пратено само за малтретирање и тоа го прави баш помеѓу два изборни круга“,
тврди службеникот.
Месецов, е испратен од матичниот град Кратово на трајна работа во Куманово. По третото распоредување, ќе се алармира на повеќе нивоа.
„Александар ќе поднесе до второстепена на Влада дека решението е незаконски, меѓутоа, знаете, кадија те тужи – кадија те суди. За тоа ќе извести и Хелсиншки комитет, Народен правобранител, ќе напише писмо до канцеларијата на ЕУ во РМ и до Американската амбасада со цел како релевантни фактори да ги запознае за тортурите кои ги врши министерот“,
вели еден од групата полицајци апсени во Куклица, а сега трајно распределени на работа од Кратово во Куманово.
Но, незаконските распоредувања не се ретки. Друг вработен во кратовската полиција тужел затоа што два пати за четири години бил преместен во Крива Паланка. Судот ја усвоил тужбата и го задолжил МВР да го врати полицаецот на работа во местото на живеење и да му ги надомести трошоците за судската постапка.
Против Александар има дисциплински мерки, кривични пријави и судски спорови, меѓу кои и дека како полицаец, агитирал за ВМРО-ДПМНЕ на избори. Сите случаи се од 2017 година наваму.
„Го обвинуваат Александар дека агитирал на избори со тоа што случајно се појавил на страната на ВМРО-ДПМНЕ, меѓутоа за тоа се води судски спор.
360°: На последното решение за Александар, за распределување во Куманово, меѓу другото се вели согласно дисциплинска постапка?
Да така е, меѓутоа, согласно дисциплинска постапка е казнет едно ниво подолу, не е казнет да работи во Куманово, он е казнет да работи едно ниво подоле, меѓутоа во Кратово“,
вели еден од полицајците.
Прераспоредувањата на кратовските полицајци и зачестените мерки за еден од нив, велат, се слика за генералната атмосфера во МВР.
„Oснов за тоа министерот наведува по потреба на службата меѓутоа знаеме дека во позадина се крие лична освета поради тоа што поголем дел од тие луѓе се неистомисленици со министерот, иако се чесни луѓе и поштено си ја работат својата работа. Сепак во Кратово атмосферата за работа е на многу лошо ниво и имаме луѓе кои исполнуваат лични желби на одредена група на луѓе…
360°: Зошто министерот би се занимавал со Кратово конкретно?
Па не знам, мислам дека и другите се соочуваат, но, луѓето немаат храброст сите да зборат, посебно пред камера, се плашат да зборат поради реперкусии…
360°: Значи ли дека претходно имавме професионална полиција, а сега веќе не?
Досега поединци секогаш имале реперкусии кога се менува власта, меѓутоа како што сега има осветољубие, немало никогаш“.
тврди еден од полицајците.
Oбјаснувањето од МВР е дека полицаецот Александар претходно е преместуван со наредби, а само последниот пат со решение, што за нив е различно.
МВР се повикува на член 154, според кој министерот или лице овластено од него може да нареди работник да извршува задачи во друга организациска единица, за итни и неодложни потреби, до 30 дена. Такви наредби претходно Александар добивал повеќепати на месечна основа, затоа и подолго работел во другите места, иако, како што самиот вели – не видел ништо итно и неодложно во тоа. Она што МВР не го одговори е зошто токму полицајците апсени во Куклица сега трајно се разместуваат од Кратово во Куманово. Нема коментар ниту на обвинувањата за партиски реваншизам.