Одговорот, сублимирано, го имате во редовите подолу. А во детали, во нацрт-законските измени кои се објавени на ЕНЕР – владиниот систем за јавна консултација за претстојни законски измени
Што се однесува до самите камери за регистрирање прекршоци, тие се од италијанскиот производител „Таттиле“. Договорот за набавката не е јавен, а цени од конкретните модели кои ги воочивме низ Скопје не најдовме ниту на интернет. Но наидовме на цени од слични модели на „Таттиле“ кои чинат по седум до осум илјади евра по парче, само за камерата. Без софтвер. Камери се поставуваат и ќе се поставуваат низ цела држава, што значи стотици, а можеби и илјадници
Секој сака да излезе убаво на фотографија или видео. Ама чиста слика од нас, а и од нашето возило, посакува и полицијата. Не за спомен-албум. И треба за казнување преку, како што се наречени новите камери, технички средства и уреди за снимање.
Само на раскрсницата меѓу булеварот „Партизански одреди„ и „Рузвелтова“, инсталирани се шест камери. Сите го носат логото на ист производител но, за тоа малку подоцна. А, на „Партизанска“, има уште 10 други раскрсници, 15-тина пешачки премини и два кружни тека.
Тие раскрсници, пешачки премини и кружни текови се распространети долж речиси шест километри на булеварот „Партизански одреди“. Еве каде, барем засега, утврдиме дека има нови камери.
Четири се поставени, а сигурно ќе има уште две или уште четири, на раскрсницата кај Соборниот храм. Уште четири има на пешачкиот премин кај Универзална сала. Шест, веќе ги спомнавме, на раскрсницата со „Рузвелтова“. Следните камери, шест на број, се на раскрсницата кај болницата „Букурешт“. Последните нови камери што ги воочивме на терен се на мостот „Обединети нации“ и единствено тие не беа поставени на место каде во непосредна близина има семафор.
Или, само на Партизанска веќе има 22 камери. А Скопје има, некои пократки – некои подолги, уште 25 булевари. Лесно е да се претпостави дека тоа значи уште стотици камери.
Сепак, нивното поставување не е големата новост. Веста е дека МВР ја почна процедурата за измени во повеќе закони, кои ќе овозможат да се казнува со фотографија или снимка од камера.
Според досега објавените нацрт-измени на Законите за безбедност во сообраќајот и Законот за прекршоците, процедурата, преку примерот на камерите за регистрирање минување на црвено светло на „Рузвелтова“, ќе изгледа вака – камерите истовремено ќе го снимаат сигналот на семафорот и табличките на возилата.
Па, кога некој ќе помине на жолто или црвено, ќе има визуелен доказ и од возилото и од прекршокот. За одредени прекршоци, ќе има фотографија и од лицето што го управува возилото.
Потоа, според нацрт-измените во Законот за безбедност на сообраќајот на патиштата…
„На сопственикот на возилото со кое е сторен сообраќаен прекршок документиран со соодветни технички средства и уреди за снимање, му се доставува известување со линк за преземање на записникот за сторен сообраќаен прекршок со прекршочен платен налог и фотозапис со кој е документиран прекршокот.“
предвидуваат нацрт-измените на член 369-а од Законот за безбедноста во сообраќајот на патиштата.
Известувањето со линкот ќе стигнува како текстуална порака на телефонот на сопственикот на возилото или на неговата електронска пошта. Ако некој не го отвори линкот, според измените во Законот за прекршоците…
По истекот на рокот од 8 дена од испраќањето на второто известување за преземање од линкот се смета дека доставата е извршена без преземање.
пишува во нацрт-измените на Законот за прекршоците, во член 48-а, став 5.
Ако сопственикот на возилото и натаму ја игнорира казната, глобата ќе му ја наплати извршител, а зависно од прекршокот – во судска постапка ќе може да ја загуби и возачката дозвола.
Во случај, пак, сопственикот на возилото да тврди дека тој не возел во критичниот момент, има две опции:
– Лично да дојде во… МВР, заедно со лицето кое во време на сторување на прекршокот управувало со возилото при што лицето дава известување дека во време на сторување на прекршокот управувало со возилото…
– Тој или лицето кое го управувало возилото во времето на сторување на прекршокот во … МВР да приложи изјава заверена на нотар дадена од лицето кое управувало со возилото, во која истото ќе потврди дека го управувало возилото во време на сторување на прекршокот…
пишува во член 48-г, во нацрт-закон за безбедноста во сообраќајот на патиштата.
Овие одредби, заедно со фотографија од возачот таму каде ќе ја има, треба да гарантираат дека казната ќе му биде припишана на оној што навистина го управува возилото. Или, барем на хартија, нема да има начин како да се избегне одговорност.
Но, намалувањето на човечкиот фактор и автоматизацијата секогаш имаат и добри и лоши страни. Граѓаните што ние ги прашавме, сепак, велат дека натежнуваат добрите.
Јас мислам дека тој систем конечно треба да проработи. Искрено се надевам дека ќе има повеќе ред, помалку прекршоци и најверојатно ќе се зголеми безбедноста на сообраќајот.
ни изјави граѓанин кој се движеше со велосипед.
Се согласувам нормално. Треба да има тоа.
ни изјави велосипедистка.
Повеќе сум за, да има. Меѓутоа не секогаш да биде автоматски. Ќе појдете во било која западноеворпска земја, па дури и во Америка сме биле ги има, меѓутоа присутна е и полицијата на терен. Јас не гледам овде по цела партизанска еден полицаец или сообраќаец било што кој ја регулира. Пак може да забележите дека има многу прекршоци
ни изјави возач на автомобил.
Сметаме дека се што е непрописно треба да биде што повеќе казниво, за луѓето да обрнуваат повеќе внимание. Не знам каква е ситуацијата кај вас, но би сакале да се зоастрат условите и во авто-школите и во авто-школите малку повеќе да се учи за како да се биде безбеден во сообраќајот, а не само почитување на прописите.
ни изјави мотоциклист од Србија.
Еден аспект поврзан со камерите што досега не е експлоатиран јавно е – кој ги купи, од каде, за колку пари? Сите овие детали се тајна, бидејќи не станува збор за постапка и договор кои се транспарентни. Познато е само дека процесот го почна минатата влада, а го продолжува сегашната.
Но, и не треба човек да биде гениј за да види чие производство се камерите. Го пребаравме текстот „Таттиле“ испишан на куќиштето на камерите на интернет и дознавме дека тоа е име на италијанска компанија која нуди системи за надзор за различни потреби.
Листајќи го нивното портфолио на производи најдовме камера со идентичен распоред на објективите, сензорите и испис на куќиштето, како на оние на раскрсницата меѓу Партизанска и Рузвелтова. Името и е, во превод, „паметна камера за црвено светло“.
Еве и видео презентација, како работи камерата заедно со софтверот.
Според описот на производителот, кога се во прашање прекршоците, конкретната камера може да регистрира само поминување на црвено светло. Но, има и други намени преку „способноста да ја препознае секоја регистарска табличка, не само на тие што прават прекршок, па е многу корисна за безбедносни цели“, пишува во каталогот.Производителот, сепак, нуди надградби, додатоци и други типови камери што можат да се комбинираат во рамките на еден систем, а кои можат да „делат“ казни дури и за забрането свртување. Веројатно, различни камери ќе служат за различни казни.
Колку чинат е потешко да се дознае. На сајтот на производителот нема цени. За конкретниот модел не најдовме цена и на друго место на интернет.
Но, наидовме на цените на други производи на „Таттиле“. Моделот „Вега 53“, кој има речиси идентични карактеристики како оние на „Паметна камера за црвено светло“, чини од 6 до 7 илјади евра по парче, без ДДВ. Само за камерата.
„Таттиле“ можеби не е препознатливо име за широката јавност, но е присутна дури и во комшии. Само во регионот, во последниве година-две нејзини производи купиле Србија, Република Српска, Турција и Грција.
Некаде камерите се за патарини, некаде за зголемување на безбедноста. За што се ќе сликаат кај нас, ќе се дознае од 1 јануари – кога ќе влезат во сила законските измени што ќе дозволат казнување преку, како што МВР ги нарекува камерите, технички средства и уреди за снимање.