Во обраќањето на Глобалниот самит организиран од Бајден, Пендаровски рече дека заеднички мора да се бориме против системските неправни со фер и правична распределба на вакцините, а истовремено и со деструктивните лажни вести и кампањи за дезинформирање
Најмалку 70 отсто од населението ќе се вакцинира против ковид-19 до крајот на оваа година.
Со вакво уверување и ветување денеска излезе претседателот Стево Пендаровски на Глобалниот самит за борба против ковид-19: Крај на пандемијата и поставување на подобри основи како подготовка за следната, што го организира американскиот претседател Џо Бајден.
Меѓутоа, за да се достигне висока стапка на вакцинација на глобално ниво, порача Пендаровски, сите треба да се бориме против системските неправди со фер, инклузивна и правична распределба на ефикасни вакцини.
Во обраќањето, тој изрази поддршка и на заедничките глобални цели за справување со пандемијата, кои ги презентирал Бајден, оценувајќи ги како клучни за запирање на оваа закана.
„Вакцинацијата ширум светот, без одлагање, е од клучно значење. Додека јас зборувам, 55 отсто од населението во Северна Македонија веќе е вакцинирано со барем една доза. Оттука, апсолутно сме сигурни и даваме ветување за целосно вакцинирање на најмалку 70 отсто од населението до крајот на оваа година. Меѓутоа, за да ја достигнеме оваа цел на глобално ниво што е можно поскоро, сите ние треба да се бориме против системските неправди со фер, инклузивна и правична распределба на ефикасни вакцини. А, во исто време, треба да се бориме со деструктивните ефекти од лажните вести и кампањите за дезинформација со ширење на вистина и транспарентност. Вакцинацијата сама по себе не е доволна. За да го излечиме светот, мораме да поставиме основи на поотпорен, интегриран, праведен и инклузивен глобален здравствен систем кој ќе ни помогне да спречиме, откриеме, реагираме и закрепнеме од какви било идни пандемии или други глобални здравствени закани“,
рече Пендаровски во дел од неговото обраќање.
Глобалниот самит за борба против ковид-19, американскиот претседател го организираше на маргините на 76. Генерално собрание на Обединетите нации, што се одржува во Њујорк.