На денешната прес-конференција, Бујар Османи кажа и дека пред неколку месеци партиите на Албанците потпишале документ со кој се обврзуваат дека нема да бидат дел од Владата без јасен договор за уставни измени
Ако новоизбраниот премиер, кој и да е, не го почитува уставното име на државата, односно Република Северна Македонија, тоа ќе значи дека го крши Уставот на државата.
Ова е став на актуелниот министер за надворешни работи и кандидат за претседател на државата од редовите на ДУИ, Бујар Османи.
„360 степени“ го праша Османи кои би биле последиците од нецелосна употреба на уставното име во официјална комуникација, откако грчкиот весник „Катимерини“ објави дека Преспанскиот договор се оспорува во предизборието во земјава.
360֯: Ако новоизбраниот премиер, кој и да е, не го користи уставното име во официјална комуникација, дали тоа може да значи ново вето од страна на Грција?
Османи: Не, тоа значи кршење на Уставот. Тоа е исто како да ги кршите законите и Уставот по однос на кое било прашање. Еве, земете кој било член во Уставот кој ве обврзува, ако не го почитувате, тоа носи одредени последици. Новото име е уставно име на Република Северна Македонија и никој не смее да биде над и против Уставот и законите.
Инаку, грчкиот весник „Катимерини“ посвети текст за еден сегмент од дуелот меѓу Мицкоски и лидерот на СДСМ, Димитар Ковачевски, кој пред два дена се случи на ТВ Канал 5.
„Водачот на главната опозициска партија во Северна Македонија изјави дека доколку биде избран за премиер земјата ќе ја нарекува единствено како ‘Македонија‘, без оглед на договорот од Преспа од 2018 година со кој се реши спорот со Грција за името на земјата“,
пишува „Катимерини“, кој важи за близок до владејачката Нова демократија на премиерот Киријакос Мицотакис.
Според тамошниот весник, за време на телевизиската дебата во пресрет на парламентарните избори што се очекуваат на 8 мај, Димитар Ковачевски, лидер на владејачкиот Социјалдемократски сојуз (СДСМ), изразил загриженост за одбивањето на лидерот на десничарската партија ВМРО-ДПМНЕ, Христијан Мицкоски, да го користи уставното име на земјата.
Инаку, на денешната прес-конференција, Бујар Османи кажа и дека пред неколку месеци партиите на Албанците во земјава потпишале документ со кој се обврзуваат дека нема да бидат дел од Владата без јасен договор за уставни измени.
„Нема билатерален договор, туку повеќето политички партии коишто се сега во различни блокови имаат потпишано документ во којшто се обврзуваат дека нема да бидат дел од влада без јасен договор за уставни измени. Затоа сум убеден дека прво ќе има договор, односно уставни измени, а потоа ќе има влада, а јас во тој период, како претседател, ќе го користам за постигнување на натпартиски и државен консензус по однос на овие прашања“,
вели Османи.
Тој е убеден дека пред формирањето на новата влада ќе има уставни измени. Доколку, пак, стане шеф на државата, рече дека прва работа што ќе ја направи ќе биде да ги свика лидерите на политичките партии на состанок, на кoј нема да излезат додека не се постигне државен консензус и порача дека за Северна Македонија нема алтернатива за членството во Европската Унија.