Погледнете го новото издание на емисијата „360 степени”, емитувано на 1 јуни 2026 г. на МРТ 1, во кое гостува поранешниот претседател на државата Стево Пендаровски
Има ли амбиција за реактивирање во политиката – беше едно од прашањата до поранешниот претседател на државата Стево Пендаровски, кој гостува во новото издание на емисијата „360 степени“ на МРТ 1. „Јас би се вратил во политика само под еден услов: ако се создадат услови да се формира сериозна, широка, голема опозициска коалиција која ќе има шанси да ја собори оваа власт“, одговори тој. Во овој сегмент од интервјуто со Пендаровски разговараме за состојбите во опозицијата и СДСМ, зошто рејтинзите се во прилог на власта и дали ВМРО-ДПМНЕ ќе оди на предвремени избори. Поранешниот претседател смета дека во 2022 г. не погрешиле со прифаќање на т.н. француски предлог затоа што „европската Преговарачка рамка, на крајот, беше без каква било опасност за македонскиот идентитет“. За блокираниот европски пат, Пендаровски вели дека во протоколите со Бугарија никаде не пишува дека доколку не се решат историските контроверзии, земјава не може да влезе во ЕУ. Тој е критичен кон пристапот на власта на поддршка на надворешнополитичките потези на Доналд Трамп велејќи дека Америка веќе не е светилник на демократијата на кој сите се угледувавме, туку „држава во која трансакционата политика е прво и последно начело или принцип по кој се води политиката“.