fbpx
Свет

(ВИДЕО) Невреме во повеќе делови од Западна Европа – има жртви, поплави и прекини на струјата

360степени | 21 октомври, 2023 00:05

Предупредувања за поплави биле издадени и во Франција и во Данска. Британските медиуми јавуваат дека има и жртви, а може да се очекуваат прекини на снабдувањето со струја. Во Ница одроните и паднатите дрвја затворија бројни патишта, а познатото шеталиште е затворено поради големите бранови

Делови од источна Шкотска и од други региони на Европа денеска беа погодени од бурата „Бабет“, која донесе поројни дождови, поплави и ветрови со брзина од 113 километри на час. Предупредувања за поплави биле издадени и во Франција и во Данска.

Британската метеоролошка служба издаде црвено предупредување за прв пат од февруари 2020 година, предвидувајќи дека во некои области ќе има и до 250 милиметри дожд. Според снимката од Шкотска која беше објавена на мрежата „Икс“, може да се види како морето се пени и ги поплавува улиците.

Во Шведска, се очекува состојбата да се подобри во сабота наутро со намалувањето на нивото на водата.

Има и жртви од невремето

Британските медиуми јавуваат дека има и жртви, а може да се очекуваат прекини на снабдувањето со струја.

Жена загинала вчера кога ја однела река, а маж загинал од дрво кое паднало врз неговиот автомобил.

„Ова е многу редок настан и најверојатно ќе видиме нови поплави“,

рече Енди Пејџ, раководител на метеоролошката служба.

Тој додаде дека може да се очекуваат прекини на струја и прекин на основните јавни услуги, повикувајќи ги да се подготват за можноста да бидат исклучени во следните неколку дена.

Жолти предупредувања се издадени во поголемиот дел од Англија, а има случај и на авион кој се излизгал од пистата на аеродромот Лидс-Бредфорд во Англија поради силниот дожд кој бил во моментот на слетувањето, јавува Скај Њуз. Нема информации за повредени.

Властите предвидоа „исклучителни врнежи“ во следните денови, што ќе резултира со големи поплави и значителен ризик по животот.

Во Обединетото Кралство ова е првиот црвен аларм од 2020 година. Погодените региони во Шкотска веќе доживеаја евакуација и затворање на училишта.

Огромни бранови и одрони во Ница, евакуирани се 250 луѓе

Властите во регионот Алп Маритим во јужна Франција ги предупредија жителите на поплави и ветрови со брзина до 130 километри на час, откако удари од гром предизвикаа прекин на електричната енергија и затворање на училиштата.

Во Ница одроните и паднатите дрвја затворија бројни патишта, а познатото шеталиште е затворено поради големите бранови. Превентивно затворени се сите училишта и градинки.

„250 луѓе се евакуирани, но никој не е повреден“,

изјави регионалниот лидер Хју Муту.

Невремето стигна до Данска и донесе поплави, населението е евакуирано

Невремето на Балтичкото море стигна до источниот брег на Данска и предизвика евакуација на населението и прекин на електричната енергија. Данската полиција ги повика жителите и туристите на социјалната мрежа „Икс“ да ја напуштат областа околу плажата Сандерсвиг бидејќи се скршил насип во близина на одморалиштето на југот на Јитланд.

Жителите на островот Мон на југоисточниот дел на земјата, исто така, беа повикани на евакуација поради поплавите. Воздушниот и траектниот сообраќај е ограничен, а на аеродромот во Копенхаген се откажани 88 летови.

Предупредувањето за „многу опасно време“ на Данскиот метеоролошки институт предвидува дека нивото на водата ќе се зголеми, при што се очекува во некои дански области во внатрешноста да има бранови и до 240 сантиметри над нормалата.

©2023 360 степени, Сите права се задржани