Според опозициската партија, директорот на Фондот Фатон Ахмети не заслужува да остане на оваа позиција зашто, како што велат, додека системот на ФЗО со денови беше нефункционален, тој користел одмор и бил во партиска посета во САД. Со тоа што не се вратил во земјава да работи на санација на кибернападот, како што велат од партијата, тој покажал оти воопшто не му е грижа за Фондот
Откако премиерот Димитар Ковачевски денеска најави дека ќе бара со државна награда да биде одликуван еден од експертите што работи на справување со кибернападите во земјава, од опозициската ВМРО-ДПМНЕ му порача дека наместо да дели награди, треба да побара оставка од директорот на ФЗО, Фатон Ахмети.
„Ковачевски, како и досега, кога станува збор за кадрите на ДУИ во институциите, или ги наградува или молчи. Не смее да преземе чекор, а не, пак, да побара оставка. За еден ден повеќе на власт, спремни се да ги одмолчат и најкруцијалните грешки кои се на штета на државата“,
велат од партијата.
Според ВМРО-ДПМНЕ, директорот на Фондот не заслужува да остане на оваа позиција зашто, како што велат, додека системот на ФЗО со денови беше нефункционален, Фатон Ахмети користел одмор и бил во партиска посета во Соединетите Американски Држави. Со тоа што не се вратил во земјава да работи на санација на кибернападот, како што велат од партијата, тој покажал оти воопшто не му е грижа за Фондот.
ВМРО-ДПМНЕ го впери прстот во директорот на Фондот обвинувајќи го дека поради неговото лошо менаџирање со институцијата, системот на ФЗО нема резервна меморија која во случај на кибернапад каков што му се случи, ќе може да ги зачува здравствените податоци на сите граѓани во државата.
„Немањето бекап на податоците на ФЗО е неверојатно коцкање со животите на граѓаните, кое може да го прави само СДС и ДУИ. Со немање бекап се става на ризик цел систем, кој може наеднаш да крахира целосно и да предизвика долгорочен застој. Доколку односот со податоците на осигурениците беше за степен попрофесионален, воопшто немаше да има паника изминативе денови, осигурениците ќе можеа редовно да пристапат кон податоците и информациите кои им се потребни, а лекарите ќе можеа навреме да земат плата“,
сметаат од опозициската партија.
Откако не присуствуваше на брифингот со новинарите на кој се зборуваше за кибернападот под кој до скоро беше Фондот за здравствено осигурување, вториот директор на ФЗО, Фатон Ахмети, објави дека причината за неговото отсуство на брифингот е неговата посета на САД која била одамна испланирана.
Тој посочи дека во САД не е на годишен одмор, туку дека таму престојува на покана на Стејт департментот на програмата ИВЛП (Интернационална програма за лидерство на посетители).
Отсуството на Фатон Ахмети од брифингот со новинарите се случува во период кога Фондот беше на удар на хакерски напад и се соочува со враќање во нормала на ИТ-системот. Хакерскиот напад предизвика големи проблеми во дејствувањето на институцијата. Поради нападот, здравствените работници не ја добија јануарската плата, а аптеките не можеа да ги услужат осигурениците со лекарства навреме.