Вулканот Нирагонго се смета за еден од најопасните во светот. Последен пат еруптираше во 2002 година, кога лавата уништи големи делови на Гома, а загинаа околу 250 лица, додека 120 000 лица останаа без покрив над главата
Најмалку 15 луѓе загинаа, а повеќе од 170 деца се водат како исчезнати по ерупцијата на вулканот Нирагонго, соопштија спасувачките екипи на Демократска Република Конго.
Други 5 лица, пак, загинаа во сообраќајка додека се евакуираа.
По ерупцијата на вулканот во саботата вечерта, лавата се спушти до градот Гома и уништи најмалку 500 домови во селата што се наоѓаат во близина на Нирагонго.
Претставници на УНИЦЕФ соопштија дека се организирани транзитни центри за да им се помогне на децата кои се без придружба на возрасни лица.
Вулканот Нирагонго се наоѓа во националниот парк Вирунга, на помалку од 20 километри северно од Гома и недалеку од границата со Руанда. Лавата пристигна до Гома, која брои два милиона жители.
По ерупцијата жителите на Гома го напуштија градот и побегнаа во Руанда, а во текот на вчерашниот ден почнаа да се враќаат во своите домови.
Вулканот Нирагонго се смета за еден од најопасните во светот. Последен пат еруптираше во 2002 година, кога лавата уништи големи делови на Гома, а загинаа околу 250 лица, додека 120 000 лица останаа без покрив над главата.