Очекувам дека во овие сто дена ќе биде полошо, вели претседателот на ВМРО-ДПМНЕ, Христијан Мицкоски
Лидерот на ВМРО-ДПМНЕ, Христијан Мицкоски, денеска уште еднаш го повтори ставот дека пратениците од редовите на неговата партија нема да гласаат на собраниската седница за избор на техничката влада.
Тој во наредните сто дена очекува продолжување на, како што вели, лошите политики, и од техничкиот премиер Талат Џафери.
„Тоа е човекот којшто од почеток до крај, како претседавач во македонскиот парламент, направил многу противуставни и противзаконски потези. Очекувам продолжување на лошите политики. Иако можеби некогаш сме биле едногласни дека од ова полошо нема, мислам дека тоа е песимистички став, треба да сме оптимисти, сепак очекувам дека во овие сто дена ќе биде полошо“,
кажа Мицкоски денеска во изјава за медиумите, пред почетокот на на конференција во организација на Паневропската унија на Македонија.
На новинарско прашање дaли очекува сè да помине како што треба околу техничката влада, Мицкоски порача:
Не очекувам турбуленции, со овие луѓе сè е возможно, гимнастики – лупинзи, сè е возможно, но не очекувам нешто што би можело да го наруши процесот. Јасен е законот, јасен е Уставот.
Во однос на евентуалната коалиција СДСМ-ДУИ во т.н. Европски фронт, Мицкоски кажа дека тоа е криминална коалиција која во обид за дефокус се брендира во европска.
„Таму нема ништо европско, освен што можеби заеднички се договараат како да го осиромашуваат и пљачкаат народот и државата, тоа е интересот што ги спојува тие политички структури. Сигурен сум дека после овие избори таа опција ќе биде жестоко поразена, ќе можат да поминат еден четиригодишен мандат во опозиција, ќе може да се реформираат, со нови луѓе, со нови политики и со нови идеи и после 4 години ќе се појават на парламентарни избори и ќе понудат нешто поконкретно и поконкурентно. Така што, ако гледаме себично од политички причини, јас ги охрабрувам час поскоро да ја формираат таа коалиција, уште утре ако може, но, ако гледам како граѓанин на оваа држава, како педагог, професор кој секојдневно ги образува студентите, тогаш ценам дека граѓаните на 8 мај или претходно на 24 април, ќе бидат многу јасни и гласни позади гласачките кутии“,
рече тој.
Инаку, мандатарот Џафери веќе ги примил сите предлози од политичките партии за министри и дополнителни заменик-министри.
На опозицијата ѝ припаѓаат министерските места во Министерството за внатрешни работи и во Министерството за труд и социјална политика и дополнителни заменички места во министерствата за финансии, за информатичко општество и администрација и за земјоделство.
Од страна на ВМРО-ДПМНЕ на овие места се предложени Панче Тошковски за технички министер за внатрешни работи и Ѓоко Велковски за министер за труд и социјална политика.
За дополнителен заменик-министер за финансиии е предложена Елена Петрова, за информатичко општество и администрација Стефан Андоновски, а за земјоделство, шумарство и водостопанство Цветан Трипуновски. Сепак, опозицијата е на став дека нема да гласа на собраниската седница за избор на техничка влада.
Џафери денеска до Собранието треба да ги достави составот и програмата на идната техничка влада, со што се отвора патот утре да се свика собраниска седница за избор на Влада.
Преодната влада се избира на 100 дена пред изборите кои се закажани за 8 мај, а ќе функционира до изборот на новата влада.