Претседателот на ВМРО-ДПМНЕ, Христијан Мицкоски, во интервју за „360 Степени“, ја коментираше иницијативата на пратеници за повторно свикување на Собранието.
Откако оцени дека тоа е противуставно, беше запрашан да ја коментира одлуката на Уставниот суд од мај 2016 година иницирана од тогашниот пратеник Талат Џафери во услови на самораспуштен парламент. Во одлуката се вели дека „мандатот на пратениците не може да продолжи во случај на самораспуштање на Собранието, надвор од условите утврдени во Членот 63, став 4 од Уставот“, односно дека може да продолжи под услови предвидени во овој член, а тоа е дека „Мандатот на пратениците во Собранието може да продолжи само во случај на воена или вонредна состојба“.
„Нашиот парламент за разлика од други е поинаков, бидејќи е во постојано заседавање. Има парламенти коишто имаат пролетна и есенска сесија, и има еден период од јули до септември кога тие не се состануваат. Нашиот парламент е во постојано заседавање. Со носење на одлука на самораспуштање на тој парламент практично завршува периодот на сесијата, односно на активниот состав на парламентот“,
вели Мицкоски.
Според Мицкоски, оваа одлука на Уставниот суд се однесува на времето додека трае активната состојба, а не по распуштањето.
Тој вели дека за ова се консултирал со врвни експерти, негови стратешки соработници.