Со солзи во очите и извинувања за неговото неуспешно водење на земјата помина говорот на лидерот на Северна Кореја, Ким Џонг-ун.
Ова е ретко обраќање на Ким во кое се извинува на жителите или во кое тој признава дека потфрлил во својата работа. Како што пренесува Гардијан, тој се обратил на нацијата за време на воената парада по повод 75 години од основањето на владејачката работничка партија.
Џонг-ун ги извади очилата и почна да ги брише солзите, а поединечни аналитичари сметаат дека тоа е показател за притисок врз неговиот режим.
„Мојот народ ми укажа верба која е висока до небото и длабока како морето, но не успеав да ги направам задоволни. Навистина ми е жал поради тоа. Иако ми е дадена важна одговорност да ја водам земјата, како што тоа го правеа големите Ким Ил-сунг и Ким Џонг-ил, мојот труд, но и искреноста не беа доволни за нашиот народ да се ослободи од тешкотиите во животот“,
вели Џонг-ун во неговиот говор.
Воената парада во Пјонгјанг беше прилика за Северна Кореја да ги претстави новите интерконтинентални балистички ракети, како и друго оружје, но одредени аналитичари сметаат дека Ким го искористи моментот за тој да покаже емпатија кон народот.
Во неговиот говор биле содржани изрази како „сериозни предизвици“, „безбројни искушенија“, „невидени катастрофи“.
Најголемиот трговски партнер на Северна Кореја е Кина, но поради пандемијата и затворањето на границите трговијата е значително опадната. Властите во Северна Кореја тврдат дека таму досега не е регистриран ниту еден случај на ковид-19.