Делницата од Ново Лисиче до Ѓорче Петров, од крај до крај, треба се поминува за околу 30 минути. Меѓу станиците се постигнува брзина на движење од 50 километри на час
Град Скопје денеска го презентираше системот за брз автобуски превоз кој, според најавите на скопскиот градоначалник Петре Шилегов, целосно треба да е готов до 2025 година. На денешната презентација се разговараше за потребите од т.н. трамвај на тркала, трасите по кои ќе се движат возилата на системот „Бас рапид транзит“, организацијата на станиците, наплатата на билетите….
„Со воведувањето на БРТ-системот, Скопје ќе стане првиот град на Балканот што ќе го имплементира ова модерно, економично и еколошки ефикасно сообраќајно решение. БРТ-системот е еден од клучните проекти во соработка со ЕБРД како дел од акцискиот план за зелен град, и значително ќе влијае на одржливата урбана мобилност и урбаниот развој на Скопје, како и на генералното унапредување на квалитетот на животот на жителите на главниот град“,
велат од Град Скопје.
Од Ново Лисиче до Ѓорче Петров за половина час
Според планот, ќе има две линии со коридори наменети исклучиво за брзите автобуси, по кои ќе се движат на хибриден погон, на гас и електрична енергија. Капацитетот ќе биде за 65 000 патници дневно, а со трамвајот на тркала треба да се скрати времето за патување од едниот до другиот крај на Скопје, од сегашните 70, на 30-ина минути.
Наплатата, односно валидацијата на билетите ќе се врши на самата станица што, како што беше посочено на денешната презентација, ќе овозможи колку што е можно пократко задржување на возилата на брзиот автобуски систем на станиците за влез и излез на патниците.
Делницата од Ново Лисиче до Ѓорче Петров, од крај до крај, треба се поминува за околу 30 минути, а меѓу станиците се постигнува брзина на движење од 50 километри на час.
„Скопје има сериозен проблем во сообраќајниот систем – недостасува брз, висококапацитативен и еколошки превоз кој ќе биде привлечен за граѓаните. Системот за брз автобуски превоз е нов тип јавен градски превоз, со физички издвоена траса за автобусите, со станици од затворен тип, со приоритет на сигнализираните раскрсници, АВЛ и информации за патниците во реално време, како и со паметни билети. Според меѓународната методологија за рангирање на брзите автобуски системи овој систем е бодиран како сребрен стандард – меѓу највисоките стандарди. Во Европа таков систем има уште во Руен, Франција и во предградие на Париз“,
рече професорот Никола Крстаноски од Техничкиот факултет во Битола на денешната презентација.
Професорот дополни дека физичката издвоеност на трасата во 82% од вкупната должина е со зелен појас, што, како што рече, е најквалитетен начин на издвојување. Во централниот дел – околу 400 метри, е пешачка зона во која се допуштени само возила на БРТ, а има и неколку кратки делници како улиците „11 Октомври“, ВМРО и „Кочо Рацин“, каде што не е можно одвојување со зелен појас, туку со сепаратори.
Генералниот менаџер на израелската компанија „РОМ транспортејшн“, Моше Хирш, во своето обраќање пред присутните рече дека нивната мисија е БРТ-системот целосно да се интегрира со постојниот автобуски систем кој е стар и треба да се реструктурира.
„Ќе направиме студии за да видиме што им треба на граѓаните на Скопје, каде живеат, каде сакаат да патуваат, во кој временски период и како. Станиците на автобусите од постојниот автобуски превоз и станиците на БРТ ќе бидат најблиску што може. Со воведувањето на БРТ, ќе се подобри услугата и на сегашниот автобуски систем со поголем број автобуси што ќе циркулираат“,
рече Хирш.
Со БРТ се воспоставуваат две линии со коридори резервирани само за ултраеколошки автобуси – од Ѓорче Петров до Ново Лисиче, и од Бутел до Кисела Вода. Трасата со правец запад-исток е во должина од 12,8 км во една насока, со 21 станица, а трасата со правец север-југ е во должина од 10,4 км и 20 автобуски станици.
ВМРО-ДПМНЕ: Шилегов прави скап и неефикасен БРТ-транспорт кој ќе создаде сообраќаен хаос
По денешната презентација, со реакција излегоа од ВМРО-ДПМНЕ од каде што обвинија дека Шилегов прави скап и неефикасен јавен транспорт, кој ќе создаде сообраќаен хаос.
„Шилегов ја замајува јавноста, едно зборува друго прави. Прво рече дека ќе ги сечат дрвјата долж средишното зеленило заради БРТ-превозот, сега нема, прво едно зборуваше за кејот, сега друго испадна. Нема една работа за која Шилегов не се премислил. Идејата на Шилегов дека ќе го сочува зеленилото при изградба на таканаречениот БРТ превоз не соодветстува со реалноста, и е уште еден маркетиншки трик бидејќи 2 метри под моменталните дрвореди главната водоводна цевка за Скопје и при откорнување на дрвјата може да дојде до нејзино оштетување и пукање. Така откорнатите дрвја ќе се уништени и за ново зеленило ќе треба да се купуваат нови дрвја. Зелените коридори кои сега ги најавува Шилегов ќе се направи сообраќаен хаос во градот Скопје“,
се вели во партиското соопштение.
Најголем проблем е претоварањето на патниците кои ќе одат на дестинации кои не се опфатени со линијата на БРТ, бидејќи на линијата по коловозните ленти по кои ќе се движи БРТ нема да можат да се движат други автобуси, додаваат од ВМРО-ДПМНЕ.
„Дополнително неуко е зголемено растојанието на автобуските станици, и се организира превозот како Скопје да е полунаселен град. Со вака поставен систем се создава проблем и при излегувањето и влегување на патниците во автобусите на БРТ имено кога ќе излегуваат од автобуската станица мора да има надпатници, за да можат да поминат на пешачка зона. Системот за сообраќање на БРТ автобусите е неефикасен затоа што автобусите ќе се движат на секој 3 минути со што во голем дел од временските интервали по шпиците ќе бидат празни и ќе оперираат со мал број на луѓе. Сакаме да потенцираме дека овој проект е многу скап и неефикасен за град Скопје со овој број на население и оваа географска распространетост на градот Скопје. Системот на БРТ превозот е неосмислен и набрзина изведен без да се земат во предвид сите други фактори кои влијаат во сообраќајното уредување на градот. Дополнително му упатуваме апел на Шилегов овој проект да не го почнува на крајот на мандатот и со тоа да не му остава проблеми на идниот градоначалник на Скопје, кој ќе треба отпосле да ги поправа неговите грешки и неспособноста“,
велат од ВМРО-ДПМНЕ.