Понудата за брак ја даде еден од обвинетите во процесот, Даниел Станчев. Тој ја побара за жена обвинетата Ирена Ивановска откако обвинителката побара тој да заврши во притвор. И Станчев и Ивановска денеска неправосилно беа осудени на затворски казни од четири, односно три и пол години затвор
Понудата за брак го одбележа денешното судско рочиште за изрекување на пресудата во случајот „Софтвери“.
Обвинетиот Даниел Станчев, сопственик на „Инвока груп“, среде судница ја запроси обвинетата Ирена Ивановска, откако двајцата неправосилно беа осудени на затворски казни од четири, односно три и пол години затвор за делото злоупотреба на службената положба и овластување.
Запросувањето се случи откако обвинителката Ивана Трајчева побара притвор за Станчев и уште тројца од неправосилно осудените (Драги Рашковски, Ивица Димитровски и Игор Христов), а во однос на сопственикот на „Инвока груп“ како причини ги наведе тоа што вадел пари во готовина од сметка на фирмата, но и тоа што лесно може да се даде во бегство со оглед дека нема имот и оформено семејство во земјава.
Додека реплицираше на барањето на обвинителката, Станчев прво потсети дека за притворите кои претходно му беа определени се води постапка пред Европскиот суд за човекови права (ЕСЧП) во Стразбур и потоа се осврна на неговата семејна положба.
„Во однос на мојата семејна состојба, што се зема како околност дека како неженет би се дал во бегство. Јас од моето срце во овој ист момент ја прашувам Ирена Ивановска дали ќе се омажи за мене, дали после сите овие години јас единствено што можам да понудам е моето срце“,
рече Станчев свртувајќи се кон обвинетата Ивановска, која седеше во судницата неколку реда зад него .
Потоа тој продолжи:
„Јас ќе бидам покрај тебе. Тоа е единствена причина што останав јас во оваа држава од самиот момент кога те запознав. И до ден-денес сум тука и немам никаква намера ништо да променам. Ќе се омажиш ли за мене?“.
Ивановска ја прифати понудата за брак, се бакнаа и се прегрнаа.
Судијката Фанка Јанчулева-Михаиловска рече: „добро, прекрасен момент за вас двајцата“, а потоа даде пауза за судечкиот совет во „Софтвери“ да одлучи за барањата за притвор.
По долго советување, советот одлучи да ги одбие барањата за притвор на Трајчева, па на Рашковски наместо ефективен му одреди куќен притвор, а на останатите тројца поблаги мерки за претпазливост.
Видео од моментот на запросување погледнете во продолжение:
*Поврзани вести: