„Длабоко сум свесен за одговорноста што ми ја даде огромната доверба искажана на изборите, ќе бидам вистински претседател на сите граѓани“, рече во својот говор новиот црногорски претседател Јаков Милатовиќ
Заврши свечената церемонија на инаугурација на новоизбраниот претседател на Црна Гора, Јаков Милатовиќ. Тој денеска положи заклетва во црногорскиот парламент и стапи на должност претседател на државата.
По заклетвата, Милатовиќ во својот говор рече дека за него е голема чест и гордост што ја презема должноста претседател на Црна Гора.
„Длабоко сум свесен за одговорноста што ми ја даде огромната доверба искажана на изборите, ќе бидам вистински претседател на сите граѓани независно од нивната политичка, национална и верска припадност или која било друга лична карактеристика“,
рече тој.
Во собраниските клупи, на свечената седница, веднаш до Милатовиќ седеше досегашниот претседател на Црна Гора, Мило Ѓукановиќ. Меѓу гостите на церемонијата беа поранешниот претседател на Црна Гора, Филип Вујановиќ, и поранешните премиери Здравко Кривокапиќ и Игор Лукшиќ.
На церемонијата присуствуваа и специјалниот пратеник на САД за Западен Балкан, Габриел Ескобар, специјалниот пратеник на Велика Британија, Стјуарт Пич, амбасадорката на САД, Џуди Рајзинг Реинке, амбасадорката на Велика Британија, Карен Медокс, како и пратеникот и поранешен премиер Душко Марковиќ, поранешниот долгогодишен шеф на парламентот, Ранко Кривокапиќ, поранешниот претседател на Собранието, Дарко Пајовиќ. На инаугурацијата присуствуваа и претседателот на Србија, Александар Вучиќ, како и претседателот на Хрватска, Зоран Милановиќ.
На крајот од седницата на платото пред Собранието се одржа церемонија на воен поздрав.
Поради доаѓањето на голем број високи функционери, подигнато е нивото на безбедност во Подгорица, патиштата во центарот на градот се затворени за сообраќај, а има и зголемено полициско присуство на сите крстосници.
Милатовиќ доминантно го победи Мило Ѓукановиќ во вториот круг од претседателските избори на почетокот на април годинава, освојувајќи 60 отсто од гласовите. Уставот на Црна Гора предвидува претседателот на државата да се избира на непосредни избори на пет години.