Италијанскиот премиер Џузепе Конте вечерва се обрати на неговите сограѓани и ги претстави новите драстични мерки што земјата ги воведува. Се затвораат сите продавници, ресторани, клубови, а дозвола за работа ќе имаат само аптеките и прехранбените продавници. Достапни ќе бидат банкарски и финансиски услуги, како и јавниот превоз.
Дозвола за работа ќе им се даде и на земјоделските продавници кои ја прехрануваат земјата.
Во видео обраќање на својот профил на Фејсбук, премиерот Конте вели дека ова е нов момент кој државата мора да го преброди.
„Ова е момент за нов чекор, најважниот чекор кој мораме да го преземеме токму сега. Нашата основна цел е да ги заштитиме сите граѓани, но воедно треба да мислиме и на тоа колкава е цената која ќе ја платиме. Свесни сме дека забрануваме слобода на движење и ја попречуваме трговијата, но во оваа ситуацијата целта ги оправдува средствата“,
рече Конте.
Вечерва се објавени нови драматични податоци како последица на коронавирусот во Италија. Само во последните 24 часа во Италија заразени се нови 2.313 лица, а починале дури 196 лица. Вкупната бројка на лица кои починале од коронавирусот во Италија досега изнесува 827. Заразени се 10.590, а оздравеле 1.045 лица.
Градоначалникот на Венеција, Луиџи Брунаро вели преживуваат длабока така.
„Првите два дена од воведувањето на карантинот, жителите велеа дека Венеција е преубава празна без гужви од туристи. Но, сега сфатија дека овој град живее од туризмот“,
додава Брунаро.
Се влошува состојбата и во здравствените установи во земјата, недостига лекарски персонал, болниците се преполни, особено во северниот дел на земјата.
„Расте потребата од болнички кревети на интензивната нега. Во рок од осум дека практично бројката на хоспитализирани скокна од 40 на 400 лица на интензивна нега“,
раскажува Ванеса Грегорц, хрватска лекарка која работи во болница во Милано, пренесува ХРТ.
Папата Франциск им порача на лекарите дека во моментов тие се најважното нешто во Италија.
„Сакам да им се обратам на сите заразени од коронавирусот и оние кои патат од неизвесноста на оваа болест. Лекарите, лекарските службеници, медицинските сестри и волонтерите кои се постојано со болните, сега се многу важни“,
рече Папата Франциск.